ఐసీసీ మెన్స్ టెస్ట్ ప్లేయర్ ర్యాంకింగ్స్లో ఇంగ్లండ్ స్టార్ బ్యాటర్ నంబర్ వన్ స్థానాన్ని దక్కించుకున్నాడు. బంగ్లాదేశ్తో జరిగిన ప్రపంచ టెస్ట్ ఛాంపియన్షిప్ సిరీస్ తొలి మ్యాచ్లో ఆస్ట్రేలియా ఓపెనర్ ట్రావిస్ హెడ్ పేలవ ప్రదర్శన చేయడంతో ర్యాంకింగ్స్లో కిందికి పడిపోయాడు. 2024 డిసెంబర్లో తొలిసారి టెస్ట్ బ్యాటింగ్ ర్యాంకింగ్స్లో నంబర్ వన్ స్థానాన్ని సాధించిన హ్యారీ బ్రూక్కు ఇది నాలుగోసారి అగ్రస్థానంలో నిలవడం. బంగ్లాదేశ్తో డార్విన్లో జరిగిన తొలి టెస్ట్లో ట్రావిస్ హెడ్ 22, 17 పరుగులు మాత్రమే చేశాడు. దీంతో అతని రేటింగ్ తగ్గి ర్యాంకింగ్స్లో వెనుకకు వెళ్లాడు. అదే సమయంలో ఇంగ్లండ్ మాజీ కెప్టెన్ జో రూట్ కూడా హెడ్ను అధిగమించాడు. ఆస్ట్రేలియా స్టార్ స్టీవ్ స్మిత్ 71, 44 పరుగులతో రాణించి మూడో స్థానానికి ఎగబాకాడు.
కెరీర్ బెస్ట్ ర్యాంక్లో శాంటో
బంగ్లాదేశ్ కెప్టెన్ నజ్ముల్ హొస్సేన్ శాంటో తన కెరీర్లోనే అత్యుత్తమ టెస్ట్ ర్యాంకింగ్ను సాధించాడు. డార్విన్ టెస్టులో అతను ఆడిన ఏకైక ఇన్నింగ్స్లో 84 పరుగులు చేయడంతో ఏకంగా తొమ్మిది స్థానాలు మెరుగుపరుచుకుని 20వ ర్యాంక్కు చేరుకున్నాడు. అతని రేటింగ్ పాయింట్లు 659కి చేరాయి. శాంటో జోరుతో భారత ఆల్రౌండర్ రవీంద్ర జడేజా, బంగ్లాదేశ్ బ్యాటర్ లిటన్ దాస్ వంటి ఆటగాళ్లు ర్యాంకింగ్స్లో వెనుకకు వెళ్లారు.
గ్రీన్కు భారీగా లాభం
ఆస్ట్రేలియా ఆల్రౌండర్ కామెరాన్ గ్రీన్ రెండో ఇన్నింగ్స్లో సెంచరీ సాధించడంతో ఐదు స్థానాలు ఎగబాకి 30వ ర్యాంక్కు చేరుకున్నాడు. బంగ్లాదేశ్ ఆటగాళ్లు మోమినల్ హక్ 31వ స్థానానికి, షాద్మాన్ ఇస్లాం 58వ స్థానానికి, మెహిదీ హసన్ మిరాజ్ 59వ స్థానానికి చేరుకున్నారు. తంజిద్ హసన్ ఏకంగా 84 స్థానాలు మెరుగుపరుచుకుని సంయుక్తంగా 88వ ర్యాంక్లో నిలిచాడు.
బౌలింగ్లో హసన్ మహమూద్ దూకుడు
బంగ్లాదేశ్ సీమర్ హసన్ మహమూద్ కూడా ర్యాంకింగ్స్లో భారీగా పురోగతి సాధించాడు. తొలి ఇన్నింగ్స్లో 55 పరుగులకు ఆరు వికెట్లు తీసిన అతను 26 స్థానాలు ఎగబాకి 38వ ర్యాంక్కు చేరుకున్నాడు. రెండో ఇన్నింగ్స్లో 66 పరుగులకు ఐదు వికెట్లు తీసిన మెహిదీ హసన్ మూడు స్థానాలు మెరుగుపరుచుకుని 24వ ర్యాంక్లో నిలిచాడు.
⚡️ Harry Brook has regained the top spot in the latest ICC Men’s Test rankings
Brook displaces Travis Head, who drops down three spots to fourth
Joe Root and Steve Smith move up to 2nd and 3rd respectively#ICCRankings pic.twitter.com/ZdQpuKBQGL
— Cricbuzz (@cricbuzz) August 19, 2026
వన్డే ర్యాంకింగ్స్లో అటల్ జోరు
ఐసీసీ వన్డే బ్యాటింగ్ ర్యాంకింగ్స్లో ఆఫ్ఘనిస్తాన్ ఆటగాడు సెదిఖుల్లా అటల్ అత్యధికంగా పురోగతి సాధించాడు. ఐర్లాండ్తో సిరీస్లో 143, 98 పరుగులు చేయడంతో 37 స్థానాలు ఎగబాకి 33వ ర్యాంక్కు చేరుకున్నాడు. ఐర్లాండ్ ఆటగాడు కర్టిస్ కాంఫర్ 23 స్థానాలు మెరుగుపరుచుకుని 36వ ర్యాంక్కు చేరాడు. ఇక కెనడా బ్యాటర్ పర్గత్ సింగ్ 10 స్థానాలు ఎగబాకి 85వ ర్యాంక్కు, ఐర్లాండ్ మాజీ కెప్టెన్ ఆండ్రూ బాల్బిర్నీ ఐదు స్థానాలు మెరుగుపరుచుకుని 47వ ర్యాంక్కు చేరుకున్నారు.