Swiggy Instamart: ఎల్పీజీ సిలిండర్లు ఇకపై క్విక్ కామర్స్ ప్లాట్ఫామ్ అయిన ఇన్స్టామార్ట్ ద్వారా అందుబాటులోకి రానున్నాయి. ఇన్స్టామార్ట్ ద్వారా ఎల్పీజీ సిలిండర్ డెలివరీ సేవను ప్రారంభించేందుకు ఇది హిందుస్థాన్ పెట్రోలియం కార్పొరేషన్ లిమిటెడ్ (హెచ్పీసీఎల్)తో కలిసి పనిచేయనుంది. వినియోగదారులు ఎల్పీజీ సిలిండర్లను ఆర్డర్ చేసి, వాటిని తమ ఇంటి వద్దకే డెలివరీ పొందేందుకు వీలుగా బెంగళూరు నగరంలో ట్రయల్ ఆపరేషన్లు ప్రారంభించింది.
క్విక్-కామర్స్ యాప్ ద్వారా దేశంలో ప్రారంభించిన మొట్టమొదటి డెలివరీ సేవ ఇది. ఈ సేవను బెంగళూరులోని సుబ్రమణిపుర ప్రాంతంలో జూలై 15 నుంచి ప్రయోగాత్మకంగా ప్రారంభించినట్లు జాతీయ మీడియా నివేదించింది. వినియోగదారులు హిందుస్థాన్ పెట్రోలియం ఇటీవల విడుదల చేసిన 10 కేజీల కాంపోజిట్ ఎల్పీజీ సిలిండర్ అయిన హెచ్పి, అలాగే ప్రస్తుతం ఉన్న ఐదు కేజీల సిలిండర్ను ఇన్స్టామార్ట్ ద్వారా ఆర్డర్ చేసుకోవచ్చు. కేవలం 10 నిమిషాల్లోనే వంట గ్యాస్ సిలిండర్ ఇంటికి తీసుకువచ్చేలా ప్లాన్ చేస్తున్నారు. ఈ ట్రాయల్ సక్సెస్ అయితే దేశ వ్యాప్తంగా అమలు చేయనున్నట్లు ఇన్స్టామార్ట్ చెబుతోంది.
ఇది కూడా చదవండి: Gold Price Today: బంగారం, వెండి కొంటున్నారా? మీకో భారీ గుడ్న్యూస్..!
ఇవి కూడా చదవండి
ఇన్స్టామార్ట్ యాప్ ద్వారా సిలిండర్లను కొనుగోలు చేయడానికి వినియోగదారులకు ఇప్పటికే గృహ ఎల్పిజి కనెక్షన్ ఉండవలసిన అవసరం లేదు. మొదటిసారిగా వినియోగదారులు సిలిండర్ను స్వీకరించే ముందు గుర్తింపు ధృవీకరణ, డెలివరీ రుజువు ప్రక్రియలను పూర్తి చేయవలసి ఉంటుంది. తదుపరి ఆర్డర్లు రీఫిల్లుగా పరిగణిస్తారు. కొత్త సిలిండర్ను తీసుకువచ్చినప్పుడు, వినియోగదారుడి వద్ద ఉన్న ఖాళీ హెచ్పిసిఎల్ సిలిండర్ను డెలివరీ ఏజెంట్ తిరిగి తీసుకువెళ్తారు.
ఇన్స్టామార్ట్ ద్వారా LPG పంపిణీ విద్యార్థులు, ఉద్యోగస్తులు, అద్దె ఇళ్లలో నివసించేవారు, చిన్న కుటుంబాలు, తాత్కాలిక వసతిలో నివసించేవారు, కాంపాక్ట్ వంటగ్యాస్ పరిష్కారం అవసరమైన వారిని లక్ష్యంగా చేసుకుంది. భద్రతా నియమాలను ఖచ్చితంగా పాటిస్తూ డెలివరీ కొనసాగించనుంది. సాంప్రదాయ స్టీల్ సిలిండర్ల స్థానంలో ఈ సిలిండర్ తేలికగా, సురక్షితంగా ఉండేలా రూపొందించారు.
సిలిండర్లోని గ్యాస్ స్థాయిని పర్యవేక్షించే వ్యవస్థ కూడా ఉంది. ఇన్స్టామార్ట్ ద్వారా ఉంచిన అన్ని ఆర్డర్లు HPCL అధీకృత పంపిణీ నెట్వర్క్ ద్వారా నెరవేర్చబడతాయని, భద్రత, నియంత్రణ ప్రోటోకాల్ల ప్రకారం శిక్షణ పొందిన సిబ్బంది ద్వారా డెలివరీలు కానున్నాయని నివేదికలు సూచిస్తున్నాయి. ఈ కొత్త పథకం అపార్ట్మెంట్లు, చిన్న ఇళ్లు, రెండవ LPG సిలిండర్ అవసరమైన వారికి గొప్ప వరం. సిలిండర్లను కొనుగోలు చేయడానికి వినియోగదారులకు ఇప్పటికే ఉన్న HP గ్యాస్ కనెక్షన్ అవసరం లేదు.
ఇది కూడా చదవండి: Telangana: విద్యుత్ షాక్తో మరణిస్తే ఎక్స్గ్రేషియా పెంపు.. TGSPDCL కీలక ప్రకటన
మరిన్ని బిజినెస్ వార్తల కోసం ఇక్కడ క్లిక్ చేయండి