వేడివేడి జొన్న, మొక్కజొన్న రొట్టెలు, ఆవకూర కాంబినేషన్ తిన్నారంటే ఇక వదిలిపెట్టరు..అయితే, జొన్న పిండితో రొట్టెలు తయారుచేయడం చాలామందికి కాస్త కష్టమైన పనిగా అనిపిస్తుంది. గోధుమ పిండిలాగా ఇందులో జిగురు ఉండకపోవడమే దానికి కారణం. రొట్టె ఒత్తుతున్నప్పుడు విరిగిపోవడం, పెనంపై కాలిన తర్వాత గట్టిగా లేదా బిరుసుగా మారడం తరచూ జరుగుతుంటుంది. మీరు కూడా ఈ సమస్యను ఎదుర్కొంటున్నట్లయితే, ఒక అద్భుతమైన సీక్రెట్ కిచెన్ హాక్ మీ కోసం! పిండిలో ఉడకబెట్టిన బంగాళాదుంపను ఉపయోగిస్తే అచ్చం హోటల్ తరహాలో మెత్తటి, పరిపూర్ణమైన మొక్కజొన్న రొట్టెలను సులభంగా తయారుచేసుకోవచ్చు.
దీనికోసం ముందుగా, 1-2 బంగాళాదుంపలను బాగా ఉడకబెట్టి పొట్టు తీయాలి. వాటిని చేతితో నలపకుండా, మెత్తటి తురుము పీటతో తురుముకోవాలి. దీనివల్ల పిండిలో ఉండలు కట్టకుండా సమానంగా కలుస్తుంది. ఒక వెడల్పాటి పాత్రలో సరిపడా మొక్కజొన్న పిండి తీసుకుని, అందులో ఈ బంగాళాదుంప తురుము, కొద్దిగా ఉప్పు, సన్నగా తరిగిన కొత్తిమీర, కావాలనుకుంటే వాము వేసి బాగా కలపాలి. బంగాళాదుంపలోని తేమ పిండికి మంచి బైండింగ్ను ఇస్తుంది. ఆ తర్వాత అవసరమైనంత గోరువెచ్చని నీటిని కొద్దికొద్దిగా చిలకరిస్తూ పిండిని ముద్దగా బాగా కలపాలి. పిండి ఎంత బాగా కలిపితే రొట్టె అంత మెత్తగా వస్తుంది.
కలిపిన పిండిని 10 నిమిషాలు పక్కన ఉంచిన తర్వాత, చిన్న ఉండలుగా చేసి ప్లాస్టిక్ పేపర్ లేదా బటర్పేపర్ సహాయంతో సులభంగా రొట్టెలా ఒత్తుకోవాలి. పిండికి బంగాళాదుంప బైండింగ్ ఇవ్వడం వల్ల రొట్టె అంచులు విరిగిపోకుండా పల్చగా వస్తుంది. పెనం బాగా వేడెక్కిన తర్వాత రొట్టెను వేసి రెండు వైపులా కొద్దిగా నెయ్యి లేదా వెన్న రాసి కాల్చుకోవాలి.
ఇవి కూడా చదవండి
ఇలా చేసుకున్నారంటే.. బంగాళాదుంపలోని పిండి పదార్థం మొక్కజొన్న పిండికి సరైన జిగురును అందిస్తుంది. రొట్టెలు ఎంతసేపైనా గట్టిపడకుండా చల్లారిన తర్వాత కూడా ఎంతో మెత్తగా ఉంటాయి. ఆలూ, కొత్తిమీర కలవడం వల్ల రొట్టెలకు ప్రత్యేకమైన రుచి వస్తుంది. ఇకపై మొక్కజొన్న రొట్టెలు చేయడం కష్టమని అనుకోకుండా, ఈ సులభమైన బంగాళాదుంప చిట్కాని పాటించి ఇంట్లోనే రుచికరమైన రొట్టెలను ఆస్వాదించండి!
మరిన్ని లైఫ్ స్టైల్ న్యూస్ కోసం క్లిక్ చేయండి..