Rent a Husband Online: భారత్లో ఆడపిల్లలను భారంగా భావించే పరిస్థితులు తరచుగా చూస్తుంటాం. కానీ యూరప్లోని ఆ దేశంలో మాత్రం పరిస్థితి దీనికి పూర్తి భిన్నంగా తయారైంది. అక్కడ మగవారి జనాభా దారుణంగా పడిపోవడంతో యువతులకు పెళ్లికి అబ్బాయిలు దొరకడం లేదు. దీంతో అక్కడి ఒంటరి మహిళలు రోజువారీ ఇంటి పనుల కోసం ఏకంగా భర్తలను గంటల చొప్పున ఆన్లైన్లో అద్దెకు తెచ్చుకుంటున్నారు.
ఉత్తర ఐరోపా ఖండంలోని అందమైన దేశం లాత్వియాలో ప్రస్తుతం ఈ వింతైన పరిస్థితి నెలకొంది. సాధారణంగా ప్రపంచవ్యాప్తంగా చాలా దేశాల్లో పురుషుల జనాభానే ఆధిపత్యం చెలాయిస్తుంది. కానీ ఈ దేశంలో మాత్రం పరిస్థితి పూర్తిగా తారుమారైంది. ఈ దేశంలో పురుషుల కంటే మహిళల జనాభా అత్యంత రికార్డు స్థాయిలో ఉంది. తాజా జనాభా లెక్కలు పరిశీలిస్తే అక్కడ మగవారి కన్నా స్త్రీల సంఖ్య ఏకంగా 15.5 శాతం అధికంగా నమోదు అయింది. ఐరోపా సమాఖ్యలోని మిగతా దేశాలతో పోలిస్తే ఈ వ్యత్యాసం దాదాపు మూడు రెట్లు ఎక్కువగా ఉండటం సామాజిక వేత్తలను సైతం ఆశ్చర్యపరుస్తోంది. మరీ ముఖ్యంగా 65 ఏళ్లు దాటిన వృద్ధుల వయసుల వారి లెక్కలు చూస్తే, మగవారి కంటే ఆడవారే రెండు రెట్లు అధికంగా జీవిస్తున్నారు. దీంతో లాత్వియాలో ఏ వీధిలో చూసినా మహిళలే ఎక్కువగా కనిపిస్తున్నారు. ఆఫీసులు, ఫ్యాక్టరీలు, ఇతర రోజువారీ పని ప్రదేశాల్లో సైతం యువతుల సంఖ్యే స్పష్టంగా ఎక్కువగా ఉంటోంది. పురుషుల కొరత తీవ్రంగా ఉండటంతో తోడు కావాల్సిన వయసులో చాలా మంది అందమైన యువతులు పెళ్లి కాకుండా ఒంటరిగానే మిగిలిపోతున్నారు. ఇక్కడ మహిళలు ఎంతో అందంగా ఉన్నా వారిని పెళ్లాడేందుకు తగినంత మంది మగవాళ్లు లేకపోవడం ఒక శాపంగా మారింది. తప్పనిసరి పరిస్థితుల్లో కొందరు అమ్మాయిలు తమ జీవిత భాగస్వామి కోసం ఏకంగా పక్క దేశాలకు వలస వెళ్లాల్సిన దయనీయమైన దుస్థితి ఏర్పడింది. 98 శాతం మంది ఆడవారే ఉన్నారని, కనీసం సరదాగా జోకులు వేసుకుని మాట్లాడుకోవడానికి కూడా మగవాళ్లు కరువయ్యారని అక్కడి వారు చెబుతున్నారు.
యాప్ల ద్వారా ఆన్లైన్లో భర్తల బుకింగ్..
ఇంట్లో మగదిక్కు లేకపోవడంతో అక్కడి మహిళలు రోజువారీ పనులు చేసుకోవడానికి తీవ్ర ఇబ్బందులు పడుతున్నారు. కరెంటు పోయినప్పుడు ఎలక్ట్రానిక్ వస్తువుల రిపేర్లు చేయడం, ప్లంబింగ్ పనులు, ఫర్నిచర్ మార్చడం, కార్పెంటరీ, ఇల్లు పెయింటింగ్ వేయడం లాంటి బరువైన పనులు ఆడవారు ఒంటరిగా చేసుకోలేరు. సరిగ్గా ఇలాంటి వాణిజ్య అవసరాల కోసమే అక్కడ కొన్ని ప్రత్యేకమైన మొబైల్ అప్లికేషన్లు ఇంటర్నెట్లో పుట్టుకొచ్చాయి. కోమండా24, రిమాంట్దార్బీ లాంటి పాపులర్ వెబ్సైట్ల ద్వారా గంటల లెక్కన మగవారిని అద్దెకు బుక్ చేసుకుంటున్నారు. “మెన్ విత్ గోల్డెన్ హాండ్స్” అనే ఆకర్షణీయమైన పేరుతో వీరు స్థానిక మహిళలకు ప్రత్యేక సేవలు అందిస్తున్నారు. కొత్త టీవీలు గోడకు బిగించడం, పాడైన కుళాయిలు బాగుచేయడం లాంటి పనుల కోసం “హస్బెండ్ ఫర్ ఆన్ అవర్” పేరుతో ఆన్లైన్ ద్వారా అద్దెకు పిలుపించుకుంటున్నారు. పని పూర్తయిన తర్వాత వారు కష్టపడిన గంటల చొప్పున వారికి కచ్చితంగా డబ్బులు చెల్లిస్తారు. కేవలం శారీరక శ్రమతో కూడిన ఇంటి పనుల కోసం మాత్రమే కాకుండా ఒంటరితనంతో బాధపడేవారు మానసిక ధైర్యం ఇచ్చే తోడు కోసం ఆన్లైన్లో భర్తలను అద్దెకు తెచ్చుకుంటున్నారు. ఇలా ఆన్లైన్ ద్వారా మగవారిని అద్దెకు తెచ్చుకోవడం లాత్వియాలోని చాలా నగరాల్లో ఇప్పుడు ఒక సాధారణ ట్రెండ్గా మారిపోయింది.
ఇవి కూడా చదవండి
అసలు మగవారు ఎందుకు అంతలా తగ్గిపోతున్నారు?
లాత్వియా దేశంలో ఈ స్థాయిలో తీవ్ర లింగ అసమానత ఏర్పడటానికి అక్కడి మగవారి ప్రమాదకరమైన జీవనశైలే ప్రధాన కారణమని అంతర్జాతీయ ఆరోగ్య నిపుణులు స్పష్టం చేస్తున్నారు. ఆడవారితో పోలిస్తే ఇక్కడ పురుషుల ఆయుర్దాయం అతి దారుణంగా తక్కువగా నమోదు అవుతోంది. వరల్డ్ అట్లాస్ సంస్థ విడుదల చేసిన తాజా నివేదికల ప్రకారం ఇక్కడి మగవారిలో పొగతాగే అలవాటు, ఆల్కహాల్ సేవించడం లాంటి వ్యసనాలు చాలా ఎక్కువగా ఉన్నాయట. లాత్వియాలోని మొత్తం పురుష జనాభాలో 31 శాతం మంది విపరీతంగా ధూమపానం చేస్తుండగా, అదే మహిళల్లో ఈ సంఖ్య కేవలం 10 శాతం మాత్రమే ఉండటం గమనార్హం. దీనికి తోడు ప్రతిరోజూ కనీస వ్యాయామం చేయకపోవడం, చెడు ఆహారపు అలవాట్ల వల్ల వచ్చే స్థూలకాయం సమస్యలు కూడా మగవారిని బలి తీసుకుంటున్నాయి. అనారోగ్యకరమైన చెడు అలవాట్ల కారణంగా స్థానిక పురుషులు అత్యంత చిన్న వయసులోనే ప్రాణాంతక రోగాల బారిన పడి అర్ధాంతరంగా ప్రాణాలు కోల్పోతున్నారు. ఇదే భయంకరమైన పరిస్థితి భవిష్యత్తులోనూ కొనసాగితే ఆ దేశంలో పురుషుల జనాభా ఉనికికే తీవ్రమైన ముప్పు వాటిల్లుతుందని సామాజిక వేత్తలు తీవ్ర ఆందోళన వ్యక్తం చేస్తున్నారు.
బ్రిటన్లోనూ వ్యాపిస్తున్న సరికొత్త ట్రెండ్..
పురుషులను ఇలా పనుల కోసం అద్దెకు తీసుకునే వింత ట్రెండ్ కేవలం లాత్వియాలోనే ఆగిపోలేదు, అగ్రరాజ్యాలకు సైతం నెమ్మదిగా విస్తరిస్తోంది. మరీ ముఖ్యంగా యునైటెడ్ కింగ్డమ్కు చెందిన లారా యంగ్ అనే మహిళ ఈ వినూత్నమైన ఐడియాతో ఏకంగా ఒక కొత్త వ్యాపారాన్నే మొదలుపెట్టింది. ఇంట్లో తన భర్త జేమ్స్ రోజంతా ఖాళీగా కూర్చోవడం ఇష్టం లేక ఇతర మహిళలకు అతని సేవలను అద్దెకు ఇవ్వడం ప్రారంభించింది. ఇందుకు సంబంధించి ఏకంగా “రెంట్ మై హ్యాండీ హస్బెండ్” అనే పేరుతో ఒక ఆన్లైన్ వెబ్సైట్ సృష్టించి తోటి మహిళలకు తన భర్తను బాహాటంగా అద్దెకు ఇస్తోంది. ఇంటి ఆవరణలోని తోట పనులు, ఇంటి లోపల అందమైన అలంకరణ, చిన్నచిన్న రిపేర్ల కోసం తన భర్త జేమ్స్ను రోజులు లేదా గంటల చొప్పున అద్దెకు పంపిస్తూ భారీగా ఫీజు వసూలు చేస్తోంది. జేమ్స్ చేసే పనులకు ఎక్కడా డిమాండ్ తగ్గకపోవడం విశేషం.
మరిన్ని ట్రెండింగ్ వార్తల కోసం ఇక్కడ క్లిక్ చేయండి..