గాజా సంక్షోభానికి శాశ్వత పరిష్కారం దిశగా కీలక పరిణామం చోటుచేసుకుంది. గాజాలో హమాస్తో పాటు ఇతర సాయుధ గ్రూపుల సంపూర్ణ నిరాయుధీకరణ కోసం చారిత్రాత్మక ఒప్పందం కుదిరినట్లు అమెరికా అధ్యక్షుడు డొనాల్డ్ ట్రంప్ ప్రకటించారు. ఈ ఒప్పందం గాజాలో శాశ్వత శాంతి, భద్రత నెలకొల్పే దిశగా కీలక అడుగుగా ఆయన అభివర్ణించారు. ట్రూత్ సోషల్ వేదికగా స్పందించిన ట్రంప్, నిరాయుధీకరణ ప్రక్రియను దశలవారీగా అమలు చేస్తామని, అనంతరం ఇజ్రాయెల్ బలగాలు గాజా నుంచి క్రమంగా ఉపసంహరించుకుంటాయని తెలిపారు.
ట్రంప్ ప్రతిపాదించిన 20 సూత్రాల శాంతి ప్రణాళిక ప్రకారం, కాల్పుల విరమణ రెండో దశలో హమాస్ తన ఆయుధాలను పూర్తిగా అప్పగించాల్సి ఉంటుంది. ఆ తర్వాత అంతర్జాతీయ స్థిరీకరణ దళం, కొత్త పాలస్తీనా పోలీసు వ్యవస్థతో కలిసి గాజాలో భద్రతను పర్యవేక్షించనుంది. అలాగే రోజువారీ పాలనను నిర్వహించేందుకు ‘గాజా పరిపాలన జాతీయ కమిటీ (NCAG)’కి బాధ్యతలు అప్పగించే ప్రతిపాదన కూడా ఈ ప్రణాళికలో ఉంది.
హమాస్కు చెందిన సీనియర్ అధికారులు కూడా ఆయుధాల అంశంతో పాటు గాజా నుంచి ఇజ్రాయెల్ బలగాల క్రమబద్ధమైన ఉపసంహరణపై చర్చల్లో పురోగతి సాధించినట్లు వెల్లడించారు. అయితే ఈ ఒప్పందంపై ఇజ్రాయెల్ ప్రభుత్వం నుంచి అధికారిక స్పందన వెలువడలేదు. ఇజ్రాయెల్ మాత్రం గాజా పూర్తిగా సైనిక రహిత ప్రాంతంగా మారిన తర్వాతే ఏ రాజకీయ ప్రక్రియ ముందుకు సాగాలని తన వైఖరిని కొనసాగిస్తోంది.
ఇదిలా ఉండగా, కాల్పుల విరమణ అమల్లో ఉన్నప్పటికీ గాజాలో హింస పూర్తిగా ఆగలేదు. గురువారం (జూలై 30) జరిగిన ఇజ్రాయెల్ వైమానిక దాడుల్లో ఇద్దరు చిన్నారులతో సహా నలుగురు మరణించినట్లు స్థానిక ఆరోగ్య అధికారులు తెలిపారు. ఈ నేపథ్యంలో కాల్పుల విరమణ రెండో దశ అమలుపై చర్చించేందుకు అమెరికా, ఈజిప్ట్, ఖతార్, టర్కీ మధ్యవర్తులతో కైరోలో కీలక సమావేశం జరగనుంది. ఈ చర్చలు సానుకూలంగా ముగిస్తే, గాజాలో శాశ్వత శాంతి దిశగా కీలక ముందడుగు పడే అవకాశం ఉందని అంతర్జాతీయ వర్గాలు భావిస్తున్నాయి.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..