Ajinkya Rahane : భారత టెస్ట్ జట్టు మాజీ వైస్ కెప్టెన్, స్టార్ బ్యాటర్ అజింక్య రహానే ఇటీవల అంతర్జాతీయ క్రికెట్లోని అన్ని ఫార్మాట్ల నుంచి సంన్యాసం తీసుకుంటున్నట్లు ప్రకటించాడు. ఒక ప్రత్యేక వీడియోను షేర్ చేస్తూ క్రీడాకారుడిగా తన మైదాన ప్రయాణాన్ని ముగిస్తున్నానని వెల్లడించాడు. అయితే క్రికెట్తో తన అనుబంధం ఇక్కడితో ముగిసిపోలేదని, తన సుదీర్ఘ అనుభవాన్ని, నేర్చుకున్న పాఠాలను యువ ఆటగాళ్లకు నేర్పిస్తూ క్రికెట్ రంగానికి సేవ చేస్తానని ఆయన పేర్కొన్నాడు. రిటైర్మెంట్ పొందిన ఆటగాళ్ల కోసం బీసీసీఐ నిర్వహిస్తున్నస్పెషల్ వెల్ఫేర్ స్కీమ్లో రహానే అత్యున్నత హైయెస్ట్ కేటగిరీ కిందకు వస్తాడు.
ఆటగాళ్లకు పెన్షన్ నిధులు బీసీసీఐకి ఎక్కడి నుంచి వస్తాయి?
క్రికెటర్లకు ఇచ్చే పెన్షన్ల కోసం బీసీసీఐ వద్ద ఒక ప్రత్యేక సంక్షేమ వ్యవస్థ ఉంది. ప్లాటినం జూబ్లీ కార్పస్ ఫండ్, ప్రత్యేక వెల్ఫేర్ ఫండ్ ద్వారా బీసీసీఐ ఈ నిధులను సేకరిస్తుంది. ముఖ్యంగా ఐపీఎల్ ప్లేఆఫ్ మ్యాచ్లు, టికెట్ల విక్రయాల ద్వారా వచ్చే ఆదాయంలో కొంత భాగాన్ని ఈ ఫండ్కు కేటాయిస్తారు. రిటైర్ అయిన మాజీ ఆటగాళ్ల ఆర్థిక పరిస్థితి బాగుండాలని, వారి భవిష్యత్తుకు భరోసా ఇవ్వాలనే ఉద్దేశంతో బీసీసీఐ ఈ పథకాన్ని ఎంతో ప్రతిష్టాత్మకంగా నిర్వహిస్తోంది.
రహానేకు ప్రతినెలా ఎంత పెన్షన్ వస్తుంది?
బీసీసీఐ ప్రస్తుత పాలసీ ప్రకారం.. భారత్ తరఫున 25 లేదా అంతకంటే ఎక్కువ టెస్టు మ్యాచ్లు ఆడిన ఆటగాళ్లకు నెలకు రూ. 70,000 చొప్పున జీవితకాల పెన్షన్ లభిస్తుంది. రహానే తన కెరీర్లో ఏకంగా 85 టెస్టు మ్యాచ్లు ఆడాడు. దీనితో పాటు 90 వన్డేలు, 20 టీ20 మ్యాచ్లలో భారత్కు ప్రాతినిధ్యం వహించాడు. అందువల్ల ఆయనకు ప్రతి నెలా రూ. 70,000 పెన్షన్ ఖాతాలో జమ అవుతుంది. కాగా రహానే ముంబై రంజీ జట్టుకు కెప్టెన్గా ఉన్నందున ముంబై క్రికెట్ అసోసియేషన్ నుంచి కూడా పెన్షన్ పొందే అర్హత ఉంది. కానీ నిబంధనల ప్రకారం బీసీసీఐ లేదా స్టేట్ అసోసియేషన్ రెండింటిలో ఏదో ఒకదాని నుంచే పెన్షన్ ఎంచుకోవాల్సి ఉంటుంది. రహానే బీసీసీఐ పెన్షన్నే ఎంచుకునే అవకాశం ఉంది.
పెన్షన్పై ఉన్న ముఖ్యమైన నిబంధన ఏమిటి?
రహానేకు లభించే ఈ జీవితకాల పెన్షన్పై ఒక కీలకమైన షరతు ఉంది. ఒకవేళ రహానే భవిష్యత్తులో బీసీసీఐలో లేదా జాతీయ జట్టులో జీతం లభించే ఏదైనా అధికారిక పదవిని (ఉదాహరణకు కోచ్, సెలెక్టర్ వంటివి) చేపడితే, ఆయనకు వచ్చే నెలవారీ పెన్షన్ నిలిపివేస్తారు. మళ్లీ ఆ పదవి నుంచి తప్పుకున్న వెంటనే పెన్షన్ పునరుద్ధరిస్తారు. రహానే తన రిటైర్మెంట్ పోస్ట్లో భవిష్యత్తులో కోచింగ్ వైపు వెళ్లే ఆలోచన ఉందనే సంకేతాలు కూడా ఇచ్చాడు.
రూ. 10 లక్షల హెల్త్ ఇన్సూరెన్స్
పెన్షన్తో పాటు రహానేకు అనేక ఇతర వైద్య ప్రయోజనాలు కూడా లభిస్తాయి. ఇండియన్ క్రికెటర్స్ అసోసియేషన్ సంయుక్త మెడికల్ ఇన్సూరెన్స్ పథకం కింద ఆయనకు రూ. 10 లక్షల వరకు ఉచిత హెల్త్ ఇన్సూరెన్స్ లభిస్తుంది. ఈ మెడికల్ ఇన్సూరెన్స్ కవరేజ్ ఆయన భార్యకు, 25 సంవత్సరాల కంటే తక్కువ వయస్సు ఉన్న అవివాహిత పిల్లలకు కూడా వర్తిస్తుంది. ఒకవేళ భవిష్యత్తులో ఏవైనా పెద్ద శస్త్రచికిత్సలు లేదా అత్యవసర వైద్య ఖర్చులు వస్తే, బీసీసీఐ మెడికల్ బెనెవోలెంట్ ఫండ్ నుంచి అదనపు ఆర్థిక సహాయం కూడా పొందే హక్కు రహానేకు ఉంటుంది.
మరిన్ని క్రీడా వార్తల కోసం ఇక్కడ క్లిక్ చేయండి.