అయితే ఒక చిన్న సీక్రెట్ ఇంగ్రిడియంట్ను ఉపయోగించి, పక్కా కొలతలతో చేస్తే గంటల తర్వాత కూడా అంతే మెత్తగా, జ్యూసీగా ఉండే పర్ఫెక్ట్ మంచూరియాను ఇంట్లోనే తయారు చేయవచ్చు. ఈ వెజ్ మంచూరియా తయారీ కోసం ముందుగా ఒక కాటన్ గుడ్డలో 120 గ్రాముల క్యారెట్ తురుము, అర కప్పు క్యాబేజీ తురుము వేసి మూటలా చుట్టి ఎంత వీలైతే అంత గట్టిగా పిండి నీటిని పూర్తిగా తొలగించాలి.
పిండిన క్యాబేజీ-క్యారెట్ మిశ్రమాన్ని ఒక ప్లేట్లోకి తీసుకుని 2 టేబుల్ స్పూన్ల మైదా, 2 టేబుల్ స్పూన్ల కార్న్ ఫ్లోర్, సరిపడా ఉప్పు వేసి కలపాలి. ఇక్కడే సీక్రెట్ చిట్కా ఉంది—ఒక చిన్న ఉడికించిన బంగాళాదుంపను చిదిమి వేసి, కొద్దిగా నీళ్లు చల్లుకుంటూ సెమీ-సాఫ్ట్ పిండిలా కలుపుకోవాలి.
బంగాళాదుంప వేయడం వల్ల మంచూరియా బాల్స్ గంటల తర్వాత కూడా మెత్తగా ఉంటాయి. ఈ పిండిని చిన్న చిన్న బాల్స్లా చుట్టుకుని, కాగుతున్న నూనెలో మీడియం ఫ్లేమ్పై ఎర్రగా వేయించి పక్కన పెట్టుకోవాలి. ఇప్పుడు సాస్ తయారీకి బాండీలో 2 టేబుల్ స్పూన్ల నూనె వేసి అల్లం, వెల్లుల్లి, పచ్చిమిర్చి తరుగు, ఉల్లిపాయ ముక్కలు వేసి హై ఫ్లేమ్పై పచ్చివాసన పోయేలా వేయించాలి.
అందులో 1 టీస్పూన్ చైనీస్ చిల్లీ పేస్ట్ లేదా షెజ్వాన్ సాస్, 1 టేబుల్ స్పూన్ టమోటో కేచప్, 1 టీస్పూన్ లైట్ సోయా సాస్, 1 టీస్పూన్ వెనిగర్, చిటికెడు పంచదార, అర టీస్పూన్ అరోమాటిక్ పౌడర్ లేదా అజినమోటో, తెల్ల మిరియాల పొడి మరియు నల్ల మిరియాల పొడి వేసి వేయించాలి.
అందులో అర కప్పు నీళ్లు పోసి నూనె పైకి తేలే వరకు మరిగించాలి. నూనె తేలాక వేయించిన మంచూరియా బాల్స్ వేసి కేవలం హై ఫ్లేమ్పై మాత్రమే టాస్ చేయాలి. సాస్ అంతా మంచూరియా బాల్స్ పీల్చుకున్న తర్వాత సన్నగా తరిగిన కొత్తిమీర చల్లుకుని దింపేస్తే నోరూరించే రెస్టారెంట్ స్టైల్ వెజ్ మంచూరియా సిద్ధమవుతుంది.