Shubman Gill: భారత్, శ్రీలంక జట్ల మధ్య ఆగస్టు 15 నుంచి రెండు మ్యాచ్ల టెస్టు సిరీస్ ప్రారంభం కానున్న సంగతి తెలిసిందే. దీనికి ముందు ఆగస్టు 7 నుంచి కొలంబో వేదికగా శ్రీలంక XI జట్టుతో టీమిండియా 3 రోజుల వార్మప్ మ్యాచ్ ఆడనుంది. అయితే ఈ కీలకమైన సిరీస్, వార్మప్ మ్యాచ్ ప్రారంభానికి ముందే భారత కెప్టెన్ శుభ్మన్ గిల్ గాయపడటం జట్టు మేనేజ్మెంట్ను తీవ్ర ఆందోళనకు గురిచేసింది. కొలంబోలో నిర్వహించిన నెట్ ప్రాక్టీస్ సెషన్లో బ్యాటింగ్ చేస్తున్న సమయంలో బంతి గిల్ కుడిచేతి బొటనవేలికి బలంగా తాకింది. గాయం తీవ్రత ఎక్కువగా ఉండటంతో గిల్ వెంటనే బ్యాటింగ్ నిలిపివేసి మెడికల్ టీమ్ వద్దకు పరుగులు తీశారు.
సహాయం అందించిన మెడికల్ టీమ్
నెట్స్ మధ్యలోనే గాయపడిన గిల్కు మెడికల్ టీమ్ వెంటనే ప్రాథమిక చికిత్స అందించింది. తీవ్రమైన నొప్పితో బాధపడినప్పటికీ, ప్రథమ చికిత్స తీసుకున్న తర్వాత శుభ్మన్ గిల్ మళ్లీ హెల్మెట్ ధరించి బ్యాటింగ్ చేయడానికి నెట్స్లోకి రావడం టీమిండియా వర్గాలకు పెద్ద ఉపశమనాన్ని ఇచ్చింది. ప్రస్తుతం లభించిన సమాచారం ప్రకారం ఈ గాయం అంత తీవ్రమైనది కాదని తెలుస్తోంది. ఈ గాయం వల్ల గిల్ మొదటి టెస్టుకు లేదా వార్మప్ మ్యాచ్కు దూరం అవుతారా లేదా అనేది ఇంకా స్పష్టంగా వెల్లడి కాలేదు.
ఒకే రోజు రెండుసార్లు దెబ్బ తగలడంపై ఆందోళన
బ్యాటింగ్ నెట్ ప్రాక్టీస్ పూర్తి చేసుకున్న తర్వాత ఫీల్డింగ్ డ్రిల్స్లో పాల్గొంటున్న సమయంలో కూడా గిల్కు మరొకసారి బంతి తగిలినట్లు నివేదికలు పేర్కొంటున్నాయి. ఫీల్డింగ్ ప్రాక్టీస్లో బంతి నేరుగా వచ్చి ఆయన చేతికి బలంగా తాకడంతో గిల్ మళ్లీ మెడికల్ టీమ్ వద్దకు వెళ్లాల్సి వచ్చింది. ఆ తర్వాత గిల్ ఫీల్డింగ్ ప్రాక్టీస్లో కొనసాగారో లేదో అనే విషయమై అధికారిక ప్రకటన రావాల్సి ఉంది. ఒకే రోజు రెండుసార్లు గాయపడటంతో కెప్టెన్ ఫిట్నెస్పై మేనేజ్మెంట్ ప్రత్యేక దృష్టి సారించింది.
ఒకవేళ గిల్ దూరమైతే సారథి ఎవరు?
ప్రస్తుతానికైతే శుభ్మన్ గిల్ సిరీస్ నుంచి లేదా వార్మప్ మ్యాచ్ నుంచి తప్పుకుంటున్నట్లు ఎలాంటి అధికారిక సమాచారం లేదు. అయితే, ఒకవేళ ముందస్తు జాగ్రత్తగా గిల్ ఏదేని మ్యాచ్కు దూరమైతే జట్టును ఎవరు నడిపిస్తారనే ప్రశ్నకు సమాధానం సిద్ధంగా ఉంది. వికెట్ కీపర్ బ్యాటర్ కేఎల్ రాహుల్ను ఈ పర్యటనకు భారత జట్టు వైస్ కెప్టెన్గా బీసీసీఐ నియమించింది. అందువల్ల గిల్ ఒకవేళ మైదానంలోకి దిగలేకపోతే కేఎల్ రాహుల్ టీమిండియా కెప్టెన్గా బాధ్యతలు స్వీకరిస్తారు.
శ్రీలంక పర్యటనకు భారత టెస్టు స్క్వాడ్
శుభ్మన్ గిల్ (కెప్టెన్), కేఎల్ రాహుల్ (వైస్ కెప్టెన్), యశస్వి జైస్వాల్, రిషభ్ పంత్ (వికెట్ కీపర్), సాయి సుదర్శన్ (ఫిట్నెస్ ఆధారంగా), ధ్రువ్ జురెల్ (వికెట్ కీపర్), రవీంద్ర జడేజా, కుల్దీప్ యాదవ్, మానవ్ సుతార్, మహమ్మద్ సిరాజ్, ప్రసిద్ధ్ కృష్ణ, గుర్నూర్ బ్రార్, దేవదత్ పడిక్కల్, సారాంశ జైన్, ఆకిబ్ నబీ.
మరిన్ని క్రీడా వార్తల కోసం ఇక్కడ క్లిక్ చేయండి..