ప్రతీఒక్కరికీ సేవింగ్స్ అకౌంట్ అనేది తప్పనిసరిగా ఉంటుంది. రోజువారీ ఖర్చుల కోసం లావాదేవీలు నిర్వహించుకునేందుకు ఈ అకౌంట్ను ఎక్కువగా ఉపయోగిస్తూ ఉంటారు. మన దేశంలో దాదాపు 90 కోట్ల మందికి సేవింగ్స్ అకౌంట్లు ఉన్నట్లు గణాంకాలు చెబుతున్నాయి. కేంద్ర ప్రభుత్వం జన్ ధన్ యోజన పథకం ప్రవేశపెట్టి జీరో అకౌంట్స్ జారీ చేయడం ప్రారంభించిన తర్వాత సేవింగ్స్ అకౌంట్ల సంఖ్య దేశంలో మరింత పెరిగింది. సేవింగ్స్ అకౌంట్ ద్వారా సులభంగా ఎప్పుడైనా లావాదేవీలు జరుపుకోవచ్చు.
అయితే సేవింగ్స్ అకౌంట్లో ఎంతవరకు నగదు ఉంచుకోచ్చనే విషయంపై ఎలాంటి పరిమితి లేదు. ఎన్ని డబ్బులైనా మీరు దాచుకోవచ్చు. చాలామంది పెద్ద మొత్తంలో నగదు జమ చేయడం లేదా విత్ డ్రా చేయడం లాంటివి చేస్తూ ఉంటారు. ఇలాంటి సమయంలో ఇన్కమ్ ట్యాక్స్ నోటీసులు అందుకోవడం లాంటిది జరుగుతూ ఉంటుంది. సేవింగ్స్ అకౌంట్లో ఎంత అయినా దాచుకునే సౌకర్యం ఉన్నప్పటికీ.. ఐటీ శాఖ కొన్ని రూల్స్ ప్రవేశపెట్టింది.
ఒక ఆర్ధిక సంవత్సరంలో రూ.10 లక్షలకు మించి సేవింగ్స్ అకౌంట్ నుంచి విత్ డ్రా చేసినా లేదా జమ చేసినా మీ లావాదేవీ వివరాలను బ్యాంకులు ఐటీ శాఖకు పంపుతాయి. మీకు వచ్చే ఆదాయం, మీ లావాదేవీలకు మధ్య పొంతన లేకపోతే ఐటీ శాఖ నోటీసులు జారీ చేయవచ్చు. మీ లావాదేవీలకు సంబంధించిన ఆధారాలను అడగవచ్చు. పెద్ద మొత్తంలో డబ్బులు మీకు ఎక్కడ నుంచి వచ్చాయనే వివరాలను ప్రశ్నించవచ్చు.
దీంతో మీ అకౌంట్లో పెద్ద మొత్తంలో నగదు లావాదేవీలు నిర్వహిస్తుంటే వాటికి సంబంధించిన ఆధారాలను భద్రపర్చుకోండి. ఇక కరెంట్ అకౌంట్ల విషయానిస్తే ఒక ఆర్ధిక సంవత్సరంలో రూ.50 లక్షల వరకు లావాదేవీలు ఎలాంటి ఇబ్బందులు లేకుండా నిర్వహించుకోవచ్చు. ఆ పరిమితి దాటితే ఐటీ శాఖ దృష్టికి వెళుతుంది. అకస్మా్త్తుగా మీ అకౌంట్లో పెద్ద మొత్తంలో డబ్బు జమ కావడం, విత్ డ్రా కావడం లాంటి వాటిపై ఐటీ శాఖ నిఘా ఉంటుంది.
మీ ఐటీఆర్లో సరైన సమాచారం ఇచ్చి మీ ఆదాయ వనరులు స్పష్టంగా ఉంటే ఎలాంటి ఐటీ నోటీస్ అందదు. మీకు వచ్చే ఆదాయానికి, మీ అకౌంట్లో జమ అయ్యే సొమ్ము సరిపోలకపోతే నోటీసులు రావొచ్చు. పదే పదే పెద్ద మొత్తంలో నగదు లావాదేవీలు నిర్వహిస్తే నోటీస్ వచ్చే అవకాశం ఉంటుంది. ఇక ఐటీఆర్ ఫైల్ చేయకుండా పెద్ద ట్రాన్సాక్షన్లు జరిపితే ఐటీ శాఖ నుంచి సమస్యలు రావొచ్చు. అకస్మా్త్తుగా ఏమైనా అనుమానాస్పద లావాదేవీలు జరిపితే ఐటీ నోటీసులు వచ్చే అవకాశం ఉంటుంది.