కీళ్ల నొప్పులు అంటే వృద్ధాప్యంలో వచ్చే సమస్యగానే చాలామంది భావిస్తారు. కానీ ప్రస్తుతం యువతలోనూ మోకాళ్లు, భుజాలు, మోచేతులు, మణికట్టు వంటి కీళ్లలో నొప్పి, బిగుతు, వాపు వంటి సమస్యలు కనిపిస్తున్నాయి. స్పోర్ట్స్ ఆడేవారు, జిమ్లో అధికంగా వ్యాయామం చేసేవారు, శారీరక శ్రమ ఎక్కువగా చేసేవారు మాత్రమే కాకుండా.. రోజువారీ జీవితంలో ఒకే రకమైన కదలికలను పదేపదే చేసే వారిలోనూ ఈ సమస్య తలెత్తవచ్చు.
అసలు కారణాలు ఏమిటి?
కీళ్ల నొప్పులకు ఒక్కటే కారణం ఉండదు. గాయం, బెణకడం, కండరాలపై అధిక ఒత్తిడి వంటివి కీలు చుట్టూ ఉన్న కణజాలాన్ని దెబ్బతీసి నొప్పి, వాపుకు కారణమవుతాయి. ముఖ్యంగా క్రీడల్లో పాల్గొనే యువతలో ఇలాంటి సమస్యలు ఎక్కువగా కనిపించవచ్చు. మరో కారణం గౌట్. శరీరంలో యూరిక్ యాసిడ్ స్థాయులు పెరిగి దాని స్ఫటికాలు కీళ్లలో పేరుకుపోతే అకస్మాత్తుగా తీవ్రమైన నొప్పి, వాపు, ఎరుపు, వేడి వంటి లక్షణాలు కనిపించవచ్చు.
అలాగే రుమటాయిడ్ ఆర్థరైటిస్ వంటి ఆటో ఇమ్యూన్ వ్యాధుల్లో రోగనిరోధక వ్యవస్థ పొరపాటున కీళ్లపై దాడి చేయడం వల్ల నొప్పి, వాపు ఏర్పడతాయి. వయసుతో ఎక్కువగా సంబంధం ఉన్న ఆస్టియో ఆర్థరైటిస్ కూడా కొన్ని సందర్భాల్లో చిన్న వయసులోనే కనిపించవచ్చు. కీళ్ల మధ్య ఉండే మృదులాస్థి దెబ్బతినడం, అరిగిపోవడం వల్ల కదలికలో నొప్పి, బిగుతు ఏర్పడుతుంది. ఇవే కాకుండా టెండినైటిస్, లూపస్, ఫైబ్రోమయాల్జియా, థైరాయిడ్ సమస్యలు, కొన్ని వైరల్ ఇన్ఫెక్షన్లు కూడా కీళ్ల నొప్పులకు కారణం కావచ్చని వైద్య నిపుణులు చెబుతున్నారు.
ఈ లక్షణాలు ఉంటే అప్రమత్తం!
కీళ్ల నొప్పితో పాటు వాపు, ఎరుపు, అధిక వేడి లేదా జ్వరం ఉంటే వెంటనే వైద్యుడిని సంప్రదించడం మంచిది. గాయం తర్వాత కీలు ఆకారం మారడం, అకస్మాత్తుగా తీవ్రమైన వాపు రావడం లేదా నొప్పి కారణంగా కీలును కదపలేకపోవడం వంటి పరిస్థితుల్లో ఆలస్యం చేయకుండా వైద్య సహాయం తీసుకోవాలి. తేలికపాటి నొప్పి కొన్నిసార్లు విశ్రాంతితో తగ్గిపోవచ్చు. కానీ నొప్పి తరచూ పునరావృతమవుతున్నా, ఎక్కువకాలం కొనసాగుతున్నా దాని కారణాన్ని తెలుసుకోవడానికి వైద్య పరీక్షలు చేయించుకోవాలి.
ముఖ్యంగా నొప్పి తగ్గించుకోవడానికి మందులను సొంతంగా దీర్ఘకాలం ఉపయోగించడం కంటే వైద్యుల సలహా తీసుకోవడం సురక్షితం. చిన్న వయసులో తరచుగా వచ్చే కీళ్ల నొప్పిని “వయసు తక్కువే కదా” అంటూ నిర్లక్ష్యం చేయకుండా.. కారణాన్ని గుర్తించి సరైన చికిత్స తీసుకోవడం ముఖ్యం.
గమనిక: ఈ కథనంలోని ఆరోగ్య సమాచారం సాధారణ అవగాహన కోసం మాత్రమే. పై లక్షణాలు వ్యాధిని నిర్ధారించేవి కావు. ఆరోగ్యంపై అనుమానం ఉంటే స్వయంగా నిర్ధారణ చేసుకోకుండా వైద్యుడిని సంప్రదించాలి. దీనిని ఆధారంగా తీసుకునే నిర్ణయాలకు మా సంస్థ బాధ్యత వహించదు.
మరిన్ని హెల్త్ వార్తల కోసం ఇక్కడ క్లిక్ చేయండి..