ఇది ఎంతో రుచిగా ఉండటమే కాకుండా గుడ్ల ద్వారా పిల్లలకు తగినంత ప్రోటీన్, పోషకాలు అందుతాయి. సేమియా ముద్దగా కాకుండా విడివిడిగా పొడిపొడిలాడుతూ రావడానికి పాటించాల్సిన చిట్కాలతో కూడిన ఈ సులువైన రెసిపీని ఇప్పుడు చూద్దాం. దీనికి కావలసిన పదార్థాలు ఒక కప్పు సేమియా, మూడు కోడిగుడ్లు, ఒకటి తరిగిన ఉల్లిపాయ, సన్నని క్యారెట్ ముక్కలు, క్యాప్సికం ముక్కలు, రెండు పచ్చిమిర్చి, ఆరేడు వెల్లుల్లి రెబ్బలు, పసుపు, కారం, నల్ల మిరియాల పొడి, ఉప్పు, నూనె మరియు తాజా కొత్తిమీర.
ఎగ్ సేమియా తయారీ విధానానికి ముందుగా పాన్లో ఒక కప్పు సేమియాను వేసి దోరగా బంగారు రంగు వచ్చే వరకు వేయించి ప్లేట్లోకి తీసుకోవాలి. అదే పాన్లో మూడు కప్పుల నీళ్లు పోసి, ఒక స్పూన్ ఉప్పు వేసి వేడిచేయాలి. నీళ్లు కాగాక వేయించిన సేమియా వేసి నాలుగు నుండి ఐదు నిమిషాలు ఉడికించాలి. సేమియా 90 శాతం వరకు మాత్రమే ఉడకాలి. వెంటనే స్టవ్ ఆపి జాలి గిన్నెలోకి వడకట్టి, పైన చల్లని నీళ్లు పోయాలి. దీనివల్ల సేమియా జిగురు లేకుండా విడివిడిగా ఉంటుంది.
మరో కడాయిలో అర టేబుల్ స్పూన్ నూనె వేసి వేడిచేయాలి. అందులో మూడు గుడ్లను పగలగొట్టి వేయాలి. దీనిపై కొద్దిగా పసుపు, అర టీస్పూన్ కారం, పావు టీస్పూన్ మిరియాల పొడి చల్లి వెంటనే కలపకుండా కాసేపు ఉంచాలి. గుడ్డు సగం ఉడికిన తర్వాత గరిటతో కాస్త పెద్ద ముక్కలుగా కదిలిస్తూ ఎగ్ స్క్రాంబుల్ చేసి ప్లేట్లోకి తీసుకోవాలి.
ఇప్పుడు అదే కడాయిలో రెండు టేబుల్ స్పూన్ల నూనె వేసి వేడయ్యాక సన్నగా తరిగిన వెల్లుల్లి ముక్కలు, పచ్చిమిర్చి, ఉల్లిపాయ, క్యారెట్, క్యాప్సికం ముక్కలు వేయాలి. మంటను హై ఫ్లేమ్లో ఉంచి ఒక్క నిమిషం పాటు వేపాలి. కూరగాయలు క్రంచీగా ఉన్నప్పుడే సరిపడా ఉప్పు, కారం, అర టీస్పూన్ మిరియాల పొడి వేసి కలపాలి.
అనంతరం ఉడికించి పక్కన పెట్టుకున్న సేమియా మరియు ఫ్రై చేసిన ఎగ్ ముక్కలను ఇందులో వేయాలి. మసాలాలన్నీ సేమియాకు పట్టేలా మీడియం మంటపై మూడు నుండి నాలుగు నిమిషాలు టాస్ చేస్తూ కలపాలి. చివరగా సన్నగా తరిగిన కొత్తిమీర చల్లుకుని స్టవ్ ఆపేయాలి. అంతే, ఎంతో ఘుమఘుమలాడే స్ట్రీట్ స్టైల్ ఎగ్ సేమియా సిద్ధం! పిల్లల లంచ్ బాక్స్లకైనా, ఈవెనింగ్ స్నాక్స్కైనా ఇది సూపర్ చాయిస్!