కాకరకాయ కూర అనగానే చాలామందికి చేదు గుర్తుకొస్తుంది. కానీ ఈ కాకరకాయ ఉల్లి కారం రెసిపీ చేదును పూర్తిగా తొలగించి, నోరూరించే రుచిని అందిస్తుంది. అయితే ఈ కూరను ఈ కింది విధంగా తయారు చేస్తే పర్ఫెక్ట్గా వస్తుంది. ఈ అద్భుతమైన వంటకాన్ని ఒకసారి రుచి చూస్తే, దాని రుచిని ఎప్పటికీ మర్చిపోలేరు. వేడి వేడి అన్నంలో కాస్త నెయ్యి వేసుకొని తింటే నాలుగైదు ముద్దలు ఎక్కువే తింటారు అనడంలో సందేహం లేదు.
కావలసిన పదార్థాలు..
- లేత కాకరకాయలు: 400 గ్రాములు
- ఉల్లిపాయలు: 250 గ్రాములు (పావు కిలో)
- పసుపు: 1 టీ స్పూన్
- ఉప్పు: రుచికి సరిపడా (కాకరకాయలకు పట్టించడానికి, ఉల్లిపాయ పేస్ట్కు)
- కారం: 2 టేబుల్ స్పూన్లు
- వెల్లుల్లిపాయలు: 7-8 రెబ్బలు
- జీలకర్ర: 1 టీ స్పూన్
- నూనె: పావు కప్పు + 2 టేబుల్ స్పూన్లు
- కరివేపాకు: ఒక రెబ్బ
ముందుగా 400 గ్రాముల లేత కాకరకాయలను తీసుకొని, చెక్కు తీసి శుభ్రం చేయాలి. ఆ తర్వాత తల, తోక తీసేసి రెండు అంగుళాల ముక్కలుగా కట్ చేసుకోవాలి. కట్ చేసిన కాకరకాయ ముక్కలకు ఒక టీ స్పూన్ పసుపు, ఒక టీ స్పూన్ ఉప్పు వేసి బాగా పట్టించాలి. ఇలా పట్టించిన తర్వాత 30 నిమిషాల పాటు పక్కన ఉంచాలి. 30 నిమిషాల తర్వాత కాకరకాయల్లోంచి నీరు బయటకు వస్తుంది. అప్పుడు ఒక్కో కాకరకాయ ముక్కను చేతితో గట్టిగా పిండాలి. ఇలా చేయడం వల్ల మిగిలిన చేదు కూడా బయటకు వచ్చేస్తుంది. అన్ని ముక్కలను ఇదే విధంగా పిండి పక్కన పెట్టుకోవాలి. ఇప్పుడు ఒక మిక్సీ జార్లో పావుకిలో ఉల్లిపాయ తరుగు, రెండు టేబుల్ స్పూన్ల కారం, ఏడెనిమిది వెల్లుల్లి రెబ్బలు, ఒక టీ స్పూన్ జీలకర్ర, రుచికి సరిపడా ఉప్పు వేసి మెత్తని పేస్ట్గా చేసుకోవాలి.
పావు కప్పు నూనెను వేడి చేసి, అందులో సిద్ధం చేసుకున్న కాకరకాయ ముక్కలను ఐదారు నిమిషాలు వేపుకోవాలి. మరీ ఎక్కువగా వేపాల్సిన అవసరం లేదు. ఇలా వేపడం వల్ల కాకరకాయల లోపల కూడా పర్ఫెక్ట్గా మగ్గుతాయి. వేగిన కాకరకాయ ముక్కల నుండి గింజలను తీసేయాలి. ఆ తర్వాత జాగ్రత్తగా తయారుచేసుకున్న ఉల్లిపాయ పేస్ట్తో నింపుకోవాలి. చాలామంది పచ్చి కాకరకాయల్లోనే ఉల్లిపాయ పేస్ట్ స్టఫ్ చేసి వండుతుంటారు. ఆ పద్ధతి కూడా బాగుంటుంది కానీ, వేగడానికి ఎక్కువ సమయం పడుతుంది, అలాగే లోపల సరిగ్గా మగ్గదు. అందుకే ఈ పద్ధతిని విస్మై ఫుడ్ సిఫార్సు చేస్తుంది. కాకరకాయలను వేపుకున్న అదే నూనెలో మరో రెండు టేబుల్ స్పూన్ల నూనె వేసి, అందులో స్టఫ్ చేసుకున్న కాకరకాయ ముక్కలన్నింటినీ సర్దుకోవాలి. మిగిలిన ఉల్లిపాయ పేస్ట్ను కూడా వేసి, నిదానంగా కలపాలి. ఈ కూరను మీడియం ఫ్లేమ్పై వేపుకోవాలి. ఉల్లిపాయల్లోని నీరు ఇగిరిపోయి, కూర ఎర్రగా వేగడానికి కనీసం 18 నుంచి 20 నిమిషాల సమయం పడుతుంది.
ఇవి కూడా చదవండి
ఈ కూరను నాన్-స్టిక్ పాన్లో కంటే కూడా కాస్ట్ ఐరన్ మూకుళ్లలో లేదా ఐరన్ మూకుళ్లలో చేస్తేనే అసలు రుచి వస్తుంది. కొద్దిగా అడుగు అంటుకున్నా, ఆ అడుగంటిన దానిలోనే అసలు రుచి ఉంటుందని గుర్తుంచుకోండి. కూర దించే ముందు ఒక రెబ్బ కరివేపాకు వేసుకొని దించుకోవాలి. బాగా సమయం తీసుకొని, ఓపిగ్గా చేసుకుంటే ఈ కూర రుచికి తిరుగుండదు. ఈ విధంగా తయారుచేసుకున్న కాకరకాయ ఉల్లి కారం చేదు లేకుండా, రుచికరంగా ఉంటుంది.