ఇరాన్తో సుదీర్ఘంగా సాగిన యుద్ధం అమెరికా సైనిక సామర్థ్యంపై కొత్త ప్రశ్నలు లేవనెత్తుతోంది. ప్రపంచంలోనే అత్యంత శక్తివంతమైన సైనిక వ్యవస్థగా భావించే అమెరికా వద్ద కీలకమైన ఎయిర్ డిఫెన్స్ ఇంటర్సెప్టర్ క్షిపణుల నిల్వలు గణనీయంగా తగ్గినట్లు తాజాగా వెలువడిన నివేదికలు చెబుతున్నాయి. ముఖ్యంగా Patriot, THAAD, ATACMS వంటి వ్యవస్థలపై ఒత్తిడి పెరిగినట్లు సమాచారం.
వాల్ స్ట్రీట్ జర్నల్ కథనం ప్రకారం, ఇరాన్పై మరింత పెద్ద స్థాయి దాడికి అమెరికా సిద్ధమైన సమయంలో.. యుద్ధాన్ని పొడిగించడం వల్ల తలెత్తే ఆయుధ కొరతపై అమెరికా అధికారులు ఆందోళన వ్యక్తం చేశారు. దౌత్య చర్చలకు అవకాశం ఇవ్వడంతో పాటు, తగ్గిపోతున్న ఎయిర్ డిఫెన్స్ నిల్వల ప్రభావాన్ని కూడా అమెరికా నిర్ణయాధికారులు పరిగణనలోకి తీసుకున్నట్లు నివేదిక పేర్కొంది.
ఇదే సమయంలో అమెరికా ఆయుధ నిల్వలపై ఆందోళనలు మరింత తీవ్రమయ్యాయి. తాజా విశ్లేషణల ప్రకారం, ఇరాన్ దాడులను అడ్డుకునేందుకు పెద్ద సంఖ్యలో ఇంటర్సెప్టర్ క్షిపణులను వినియోగించడంతో యూరప్లోని అమెరికా రక్షణ సామర్థ్యంపై ప్రభావం పడింది. Patriot నిల్వలు 1,000 కంటే దిగువకు, THAAD నిల్వలు సుమారు 250కు చేరినట్లు CSIS అంచనా వేసింది.
అమెరికా యూరప్లోని కొన్ని రక్షణ వ్యవస్థలను మధ్యప్రాచ్యానికి తరలించడం వల్ల భవిష్యత్తులో రష్యా లేదా చైనా వంటి ప్రత్యర్థులతో సంక్షోభం తలెత్తితే ఒకేసారి పలు ప్రాంతాలను రక్షించడం క్లిష్టమవుతుందనే ఆందోళనలు వ్యక్తమవుతున్నాయి. అయితే అమెరికా రక్షణ శాఖ మాత్రం దేశం వద్ద ఆయుధాలు పూర్తిగా అయిపోయాయన్న వాదనలను ఖండిస్తోంది. ఇదే సమయంలో తైవాన్ భద్రతపైనా ప్రశ్నలు తలెత్తుతున్నాయి. ఇరాన్ యుద్ధం కారణంగా అమెరికా ఆయుధ నిల్వలపై ఏర్పడిన ఒత్తిడి, చైనా-తైవాన్ సంక్షోభం వంటి పరిస్థితుల్లో అమెరికా తక్షణ స్పందన సామర్థ్యాన్ని ప్రభావితం చేయవచ్చని నిపుణులు హెచ్చరిస్తున్నారు.
అయితే అమెరికా తన సైనిక బలాన్ని ప్రదర్శించే ప్రయత్నాలను కొనసాగిస్తోంది. ‘Freedom Edge’ పేరిట అమెరికా, జపాన్, దక్షిణ కొరియా సెప్టెంబర్ 7 నుంచి 11 వరకు జెజు ద్వీపానికి తూర్పు, దక్షిణ ప్రాంతాల్లో సంయుక్త సైనిక విన్యాసం నిర్వహించనున్నాయి. ఉత్తర కొరియా అణు, క్షిపణి ముప్పులను ఎదుర్కొనేందుకు ఈ విన్యాసం నిర్వహిస్తున్నట్లు మూడు దేశాలు చెబుతున్నాయి. మరోవైపు అమెరికా నౌకాదళం కొత్త దీర్ఘశ్రేణి LRAAM ‘Malice’ క్షిపణిని కూడా ఆవిష్కరించింది. దీని పరిధి సుమారు 250 నాటికల్ మైళ్లు (463 కి.మీ.)గా వెల్లడైంది. 4వ, 5వ, 6వ తరం యుద్ధ విమానాల కోసం దీనిని అభివృద్ధి చేస్తున్నట్లు అమెరికా నేవీ తెలిపింది.
అందుకే అసలు ప్రశ్న ఒక్కటే.. అమెరికా ఇరాన్ యుద్ధాన్ని ఆపింది శాంతి కోసం తీసుకున్న వ్యూహాత్మక నిర్ణయమా? లేక క్షీణిస్తున్న ఆయుధ నిల్వలకు సమయం కొనుగోలు చేసేందుకా? తాజా పరిణామాలు మాత్రం అమెరికా ముందు యుద్ధ సామర్థ్యంతో పాటు ఆయుధ ఉత్పత్తి సామర్థ్యాన్ని వేగంగా పెంచాల్సిన అవసరం ఉందనే విషయాన్ని స్పష్టం చేస్తున్నాయి.
మరిన్ని అంతర్జాతీయ వార్తల కోసం ఇక్కడ క్లిక్ చేయండి..