Lionel Messi Net Worth 2026: ప్రపంచ ఫుట్బాల్ దిగ్గజం లియోనెల్ మెస్సీ అంతర్జాతీయ కెరీర్కు వీడ్కోలు పలికిన సంగతి తెలిసిందే. అర్జెంటీనా జాతీయ జట్టు తరపున 2 దశాబ్దాలకుపైగా కొనసాగిన ఈ దిగ్గజం ప్రయాణం ముగిసింది. ఈ క్రమంలో మెస్సీ వ్యక్తిగత జీవితం, ఆస్తులు, ఆదాయ మార్గాలపై మరోసారి ఆసక్తి పెరిగింది. ఫోర్బ్స్ అంచనా ప్రకారం మెస్సీ నికర ఆస్తుల విలువ $1.1 బిలియన్ డాలర్లుగా ఉంది.
అంతర్జాతీయ ఫుట్బాల్కు వీడ్కోలు..: 39 ఏళ్ల మెస్సీ ఆగస్టు 31న అర్జెంటీనా జాతీయ జట్టు నుంచి తప్పుకుంటున్నట్లు ప్రకటించిన సంగతి తెలిసిందే. 2026 ప్రపంచకప్ ఫైనల్లో స్పెయిన్ చేతిలో అర్జెంటీనా ఓటమి తర్వాత ఈ నిర్ణయం తీసుకున్నాడు. జాతీయ జట్టు తరపున ఇక ఆడబోనని స్పష్టం చేసినప్పటికీ.. క్లబ్ ఫుట్బాల్కు మాత్రం కొనసాగింపు ఇచ్చాడు. ప్రస్తుతం ఇంటర్ మయామి తరపున ఆడుతున్న మెస్సీ ఒప్పందం 2028 వరకు ఉంది.
మెస్సీ సంపద ఎంతంటే..? ఫోర్బ్స్ తాజా అంచనా ప్రకారం మెస్సీ నెట్వర్త్ $1.1 బిలియన్ డాలర్లుగా ఉంది. అంటే భారత కరెన్సీలో ఇది సుమారు రూ.9,000 కోట్లకు పైగా ఉంటుంది. ఫుట్బాల్ కాంట్రాక్టులు, బ్రాండ్ ఎండార్స్మెంట్లు, వ్యాపార ఒప్పందాల ద్వారా అతడు భారీ ఆదాయాన్ని ఆర్జించాడు. ఫోర్బ్స్ ప్రకారం.. తన కెరీర్లో ఇప్పటివరకు మెస్సీ పన్నులు, ఏజెంట్ ఫీజులకు ముందు సుమారు $1.8 బిలియన్ల ఆదాయాన్ని సంపాదించాడు. అడిడాస్తో జీవితకాల ఎండార్స్మెంట్ ఒప్పందం కూడా అతడి ఆదాయ వనరుల్లో ఒకటిగా నిలిచింది.
బార్సిలోనా నుంచి ఇంటర్ మయామి వరకు..: మెస్సీ ఫుట్బాల్ కెరీర్లో అత్యంత కీలక భాగం బార్సిలోనాతోనే సాగింది. 13 ఏళ్ల వయసులో బార్సిలోనా అకాడమీలో చేరిన అతడు.. 2004లో సీనియర్ జట్టులో అరంగేట్రం చేశాడు. అక్కడ 17 సంవత్సరాలు ఆడిన తర్వాత పారిస్ సెయింట్-జెర్మైన్కు వెళ్లాడు. అనంతరం 2023లో అమెరికా మేజర్ లీగ్ సాకర్లోని ఇంటర్ మయామిలో చేరాడు.
ఎండార్స్మెంట్లతో భారీ ఆదాయం..: మైదానంలో సంపాదించిన మొత్తంతో పాటు మెస్సీకి ప్రపంచవ్యాప్తంగా ఉన్న బ్రాండ్ విలువ కూడా అతడి సంపదను పెంచింది. అడిడాస్తో పాటు పలు అంతర్జాతీయ సంస్థలతో అతడికి వాణిజ్య ఒప్పందాలు ఉన్నాయి. ఫోర్బ్స్ ప్రకారం 2026లోనే మెస్సీ మొత్తం ఆదాయం సుమారు $140 మిలియన్లుగా అంచనా వేశారు.
అర్జెంటీనా తరపున చిరస్మరణీయ ప్రయాణం..: 2005లో అర్జెంటీనా సీనియర్ జట్టులోకి వచ్చిన మెస్సీ.. జాతీయ జట్టు తరపున 207 మ్యాచ్ల్లో 125 గోల్స్ చేశాడు. 2022 ప్రపంచకప్ విజయంతో పాటు 2021, 2024 కోపా అమెరికా టైటిళ్లు సాధించాడు. 2026 ప్రపంచకప్ ఫైనల్ వరకు అర్జెంటీనాను తీసుకెళ్లాడు.