ఉల్లిపాయ ముక్కలకు మసాలాలు పట్టే విధానం, ఆమ్లెట్ డ్రై కాకుండా జ్యూసీగా, ఫ్లఫీగా రావడానికి పాటించాల్సిన చిన్న చిన్న చిట్కాలతో ఈ మసాలా ఆమ్లెట్ తయారీ విధానాన్ని ఇప్పుడు వివరంగా చూద్దాం.
కావలసిన పదార్థాలు: 2 లేదా 3 గుడ్లు, కటి – సన్నగా పొడవుగా తరిగిన పెద్ద ఉల్లిపాయ, ఒక పచ్చిమిర్చి సన్నని తరుగు, చిటికెడు పసుపు, తగినంత కారం పొడి, పావు టీస్పూన్ ధనియాల పొడి, పావు టీస్పూన్ గరం మసాలా, పావు టీస్పూన్ కంటే తక్కువ మిరియాల పొడి, తరిగిన కొత్తిమీర, రుచికి సరిపడా ఉప్పు, ఒకటి నుండి రెండు స్పూన్ల పాలు లేదా నీళ్లు, రెండు తరిగిన వెల్లుల్లి రెబ్బలు, తాజా కరివేపాకు తరుగు, మరియు కాల్చడానికి 2 స్పూన్ల నూనె.
తయారీ విధానం: ఒక గిన్నెలో సన్నగా తరిగిన ఉల్లిపాయ ముక్కలు, పచ్చిమిర్చి తరుగు, పసుపు, కారం, ధనియాల పొడి, గరం మసాలా, మిరియాల పొడి, కొత్తిమీర మరియు తగినంత ఉప్పు వేయాలి. చేత్తో ఈ మిశ్రమాన్ని గట్టిగా నలపాలి. ఇలా పిసకడం వల్ల ఉల్లిపాయలోని నీరు బయటకు వచ్చి మసాలాలన్నీ ముక్కలకు సమానంగా పట్టుకుంటాయి. దీనివల్ల ఆమ్లెట్ వేసినప్పుడు ఉల్లిపాయలు పచ్చిగా ఉండకుండా త్వరగా ఉడుకుతాయి.
ఆమ్లెట్ మరీ డ్రై అవ్వకుండా, సాఫ్ట్గా రైస్లో కలుపుకోవడానికి వీలుగా ఉండాలంటే ఇందులోనే రెండు స్పూన్ల పాలు లేదా నీళ్లు కలపాలి. ఆ తర్వాత గుడ్లను పగలగొట్టి వేసి ఫోర్క్ లేదా స్పూన్తో బాగా బీట్ చేయాలి. ఎంత బాగా గిలకొడితే ఆమ్లెట్ అంత ఫ్లఫీగా, మృదువుగా వస్తుంది. ఈ దశలోనే ఉప్పు, కారాలు సరిచూసుకోవాలి. స్టవ్ మీద కాస్త చిన్నగా, గుంటగా ఉండే కడాయి లేదా పెనం పెట్టి రెండు స్పూన్ల నూనె వేడిచేయాలి.
నూనె కాగాక మంటను తగ్గించి సన్నగా తరిగిన వెల్లుల్లి ముక్కలు, చిన్నగా తుంచిన తాజా కరివేపాకు వేసి చిటపటలాడనివ్వాలి. వెంటనే గుడ్డు మిశ్రమాన్ని అంతటా సమానంగా పోయాలి. కడాయి చిన్నగా ఉండటం వల్ల ఆమ్లెట్ చక్కగా మందంగా వస్తుంది. పైన కొద్దిగా కొత్తిమీర చల్లి మూతపెట్టి చిన్న మంటపై ఉడికించాలి. ఒకవైపు ఎర్రగా కాలిన తర్వాత రెండో వైపుకు తిప్పి మరో నిమిషం పాటు కాల్చి దించాలి. అంతే, ఘుమఘుమలాడే స్పైసీ మసాలా ఆమ్లెట్ సిద్ధం! వేడివేడి అన్నంలో ఈ ఆమ్లెట్ను నలుపుకుని తింటుంటే అచ్చం ఎగ్ రైస్ తిన్నట్లే ఉంటుంది!