భారతీయ వంటకాల్లో నెయ్యికి ప్రత్యేక స్థానం ఉంది. పప్పు, వేడివేడి అన్నం, స్వీట్లలో కాస్తంత నెయ్యి తగిలిస్తే వచ్చే రుచే వేరు. అయితే నిత్యం నెయ్యి తినేవారిలో ఒక సాధారణ సందేహం ఎప్పుడూ మెదులుతూనే ఉంటుంది.. ఆరోగ్యానికి ఆవు నెయ్యి మంచిదా? లేక బర్రె నెయ్యి మంచిదా? ఈ అంశంపై ప్రముఖ పోషకాహార నిపుణురాలు మంజురి కులకర్ణి కీలక విషయాలను వెల్లడించారు.
ఆవు నెయ్యి vs గేదె నెయ్యి: ప్రధాన తేడా ఏమిటి?
ఆవు నెయ్యి, బర్రె నెయ్యి రెండింటిలోనూ ఆరోగ్యకరమైన కొవ్వులు ఉంటాయి. అయితే వాటిలో ఉండే కొవ్వు పరిమాణంలోనే ప్రధాన వ్యత్యాసం కనిపిస్తుంది.
బర్రె నెయ్యి: ఇందులో కొవ్వు శాతం, కేలరీలు చాలా ఎక్కువ. బరువు పెరగాలనుకునేవారికి, కఠిన శారీరక శ్రమ చేసేవారికి ఇది ఉపయోగపడుతుంది.
ఆవు నెయ్యి: గేదె నెయ్యితో పోలిస్తే ఇందులో కొవ్వు శాతం తక్కువ. ఇది సులభంగా జీర్ణమవుతుంది. బరువు నియంత్రణలో ఉండాలనుకునేవారికి, పిల్లలకు ఇది మంచి ఎంపిక.
ఏ నెయ్యి వాడుతున్నామన్న దానికంటే రోజువారీ ఆహారంలో ఎంత మోతాదులో తీసుకుంటున్నామన్నదే ఆరోగ్యానికి అత్యంత కీలకమని నిపుణులు స్పష్టం చేస్తున్నారు.
ఇంట్లో తయారుచేసిన నెయ్యే మేలు
నెయ్యిని తయారుచేసే పద్ధతి కూడా దాని నాణ్యతను, పోషక విలువలను ప్రభావితం చేస్తుంది. మార్కెట్లో లభించే ప్యాకెట్ నెయ్యిల కంటే, ఇంట్లోనే సంప్రదాయ పద్ధతిలో వెన్న కాచి తయారుచేసుకునే నెయ్యిని వాడటమే మంచిది. ఇంట్లో చేసుకుంటే స్వచ్ఛతపై నమ్మకం ఉండటంతో పాటు ఎలాంటి కల్తీలు, ప్రిజర్వేటివ్లు ఉండే అవకాశం ఉండదు.
రోజూ ఎంత మోతాదులో తీసుకోవాలి?
నెయ్యి ఆరోగ్యానికి మంచిదే అయినప్పటికీ, అది కొవ్వు పదార్థం అనే విషయాన్ని గుర్తుంచుకోవాలి. మనం రోజూ వాడే వంటనూనె, నెయ్యి రెండింటినీ కలిపి సమతుల్యంగా లెక్కించుకోవాలి. కేవలం ఆరోగ్యకరమైనది అన్న కారణంతో నెయ్యిని మితిమీరి వాడకూడదు. రోజూ ఒకటి నుంచి రెండు టీస్పూన్ల నెయ్యి తీసుకోవడం ఆరోగ్యానికి సరిపోతుంది.
వీరు తప్పనిసరిగా జాగ్రత్త పడాలి..
అధిక రక్తపోటు, గుండె సంబంధిత సమస్యలు, అధిక బరువు, అధిక కొలెస్ట్రాల్తో బాధపడేవారు నెయ్యి వినియోగంలో మరింత అప్రమత్తంగా ఉండాలి. ముఖ్యంగా కొలెస్ట్రాల్ నియంత్రణ కోసం మందులు వాడేవారు వైద్యులు లేదా డైటీషియన్ల సలహా మేరకే రోజువారీ నెయ్యి పరిమాణాన్ని ఖరారు చేసుకోవాలి. ఆరోగ్య సమస్యలు లేని సాధారణ వ్యక్తులు సైతం నెయ్యిని మితంగా తీసుకుంటూ, క్రమం తప్పకుండా వ్యాయామం, సమతుల్య ఆహారం అలవరచుకుంటేనే దాని పూర్తి ప్రయోజనాలు అందుతాయి.