వంటగదిలో సమయాన్ని ఆదా చేసుకోవడానికి, వేగంగా రుచికరమైన వంటకాలను సిద్ధం చేసుకోవడానికి కొన్ని టిప్స్ అద్భుతంగా సహాయపడతాయి.. అలాంటి వాటిలో ఒకటి ఇన్స్టంట్ చట్నీ ప్రీమిక్స్ పౌడర్. ఈ పొడిని ఇంట్లో సులభంగా తయారు చేసుకుని, నిల్వ ఉంచుకోవడం ద్వారా ఎప్పుడంటే అప్పుడు, నిమిషాల్లో అద్భుతమైన చట్నీని సిద్ధం చేసుకోవచ్చు. ఈ ప్రీమిక్స్ పొడి వర్కింగ్ ఉమెన్స్, బ్యాచిలర్స్, అలాగే రూమ్స్లో ఉండే వారికి ఒక వరం లాంటిది. ఉదయం అల్పాహారం కోసం చట్నీ తయారు చేయడానికి తక్కువ సమయం ఉన్నప్పుడు, లేదా అకస్మాత్తుగా అతిథులు వచ్చినప్పుడు, ఈ పొడి ఉంటే చాలు, కేవలం నీళ్లు కలిపి నిమిషాల్లో చట్నీని రెడీ చేసుకోవచ్చు. ఇడ్లీ, దోశ, ఉప్మా, పొంగల్ వంటి అన్ని రకాల టిఫిన్స్లోకి ఈ చట్నీ చాలా చాలా బాగుంటుంది. దీనిని ఇడ్లీ పొడిలా కూడా నెయ్యితో కలిపి తీసుకోవచ్చు.
ప్రీమిక్స్ పౌడర్ తయారీకి కావలసిన పదార్థాలు:
- పల్లీలు (వేరుశెనగలు): 1 కప్పు (దాదాపు 1/4 కిలో)
- పుట్నాలు (తినే శనగపప్పు): పల్లీలు ఎంత తీసుకుంటారో అంత
- ఎండు కొబ్బరి ముక్కలు: 1/4 కప్పు (కావాలంటే)
- ఎండు మిర్చి: 20 వరకు (మీ కారానికి తగ్గట్టు సర్దుబాటు చేసుకోవచ్చు)
- జీలకర్ర: 1 టీస్పూన్
- కరివేపాకు: 1 కప్పు
- చింతపండు: చిన్న నిమ్మకాయంత
- వెల్లుల్లి రెబ్బలు: 10-12
- ఉప్పు: రుచికి సరిపడినంత (కల్లుప్పు వాడటం మంచిది)
- నూనె: 2 టీస్పూన్లు
తయారీ విధానం:
పల్లీలు వేయించడం: ముందుగా ఒక పాన్లో పల్లీలను వేసి, లో-టు-మీడియం మంటపై మాడిపోకుండా కలుపుకుంటూ గోల్డెన్ బ్రౌన్ రంగు వచ్చేవరకు వేయించాలి. వేగిన తర్వాత ఒక ప్లేట్లో పోసి పూర్తిగా చల్లారనివ్వాలి.
పుట్నాలు వేయించడం: అదే పాన్లో పుట్నాలను రెండు నిమిషాల పాటు తక్కువ మంటపై వేయించాలి. ఇవి లైట్గా వేగితే సరిపోతుంది. వేగిన తర్వాత పల్లీలతో కలిపి చల్లారనివ్వాలి.
ఎండు కొబ్బరి వేయించడం: కావాలంటే, ఎండు కొబ్బరి ముక్కలను కూడా రెండు నిమిషాల పాటు వేయించి, పల్లీలతో కలిపి చల్లారనివ్వాలి.
ఎండు మిర్చి, జీలకర్ర వేయించడం: ఇప్పుడు పాన్లో రెండు టీస్పూన్ల నూనె వేసి, నూనె కాగిన తర్వాత ఎండు మిర్చిని తుంచి వేయాలి. తక్కువ మంటపై మాడిపోకుండా క్రిస్పీగా అయ్యేవరకు వేయించి, చివరిలో జీలకర్ర వేసి మరో రెండు నిమిషాలు వేయించాలి. వేగిన తర్వాత వీటిని ఒక ప్లేట్లోకి తీసుకోవాలి.
కరివేపాకు వేయించడం: శుభ్రంగా కడిగి తడి లేకుండా తుడుచుకున్న కరివేపాకును అదే పాన్లో వేసి, తక్కువ మంటపై క్రిస్పీగా అయ్యేవరకు వేయించాలి. వేగిన కరివేపాకును ఎండు మిర్చితో కలిపి చల్లారనివ్వాలి.
చింతపండు వేయించడం: చిన్న నిమ్మకాయంత చింతపండును శుభ్రం చేసి పాన్లో వేసి, తక్కువ మంటపై ఒక నిమిషం పాటు వేయించి స్టవ్ ఆఫ్ చేయాలి. వేడి పాన్లోనే చింతపండును ఉంచడం వలన అది బాగా ఆరి, మెత్తని పొడిగా మారడానికి సహాయపడుతుంది. పూర్తిగా చల్లారనివ్వాలి.
పొడిగా చేసుకోవడం: ఎండు మిర్చి, కరివేపాకు పూర్తిగా చల్లారిన తర్వాత, మిక్సీ జార్లోకి (తడి లేకుండా చూసుకోండి) వేసుకోవాలి. రుచికి సరిపడినంత ఉప్పు కూడా వేసి, మధ్యమధ్యలో ఆపుకుంటూ వీలైనంత మెత్తగా పొడి చేసుకోవాలి.
మిగతా పదార్థాలు కలపడం: ఇప్పుడు పూర్తిగా చల్లారిన పల్లీలు, పుట్నాలు, ఎండు కొబ్బరిని ఈ పొడిలో వేయాలి. పల్లీల నుండి నూనె రాకుండా మధ్యమధ్యలో ఆపుకుంటూ గ్రైండ్ చేయాలి.
చివరగా వేయించి చల్లార్చుకున్న చింతపండు, వెల్లుల్లి రెబ్బలను వేసి, ఒకసారి పొడిలో బాగా కలిపి, మళ్ళీ మధ్యమధ్యలో ఆపుకుంటూ మెత్తని పొడిగా గ్రైండ్ చేసుకోవాలి.
నిల్వ – ఉపయోగం: తయారైన పొడి కొంచెం వేడిగా ఉంటుంది. ఒక ప్లేట్లో పోసి పూర్తిగా చల్లారిన తర్వాత, గాలి చొరబడని గాజు సీసాలో నిల్వ చేసుకోవాలి. ఫ్రిజ్లో పెట్టకపోయినా చాలా రోజుల వరకు తాజాగా ఉంటుంది, ఫ్రిజ్లో పెడితే ఇంకా ఎక్కువ రోజులు నిల్వ ఉంటుంది. చట్నీ కోసం కావలసినంత పొడిని తీసుకుని, తగినన్ని మామూలు నీళ్లు కలిపి చిక్కదనాన్ని సర్దుబాటు చేసుకోవచ్చు. కావాలంటే పోపు కూడా వేసుకోవచ్చు. ఈ ఇన్స్టంట్ చట్నీ ప్రీమిక్స్ పౌడర్తో మీ వంటగది పని సులభం అవుతుంది.. ఇంకెందుకు ఆలస్యం మీరు కూడా ట్రై చేయండి..
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..