డిజిటల్ ప్రపంచం మరింత సులువుగా మారుతున్నప్పటికీ మరోవైపు మోసగాళ్లు కృత్రిమ మేధస్సు సాయంతో ఎవరికి ఎప్పుడు ఉచ్చు బిగిస్తారో అంతుచిక్కని పరిస్థితులు ఏర్పడుతున్నాయి. మనకు తెలిసిన బంధువుల గొంతులను క్లోనింగ్ చేసి డబ్బులు గుంజుతున్న ఈ నకిలీ దారులను ముందుగానే గుర్తించి అప్రమత్తంగా ఉండటం ద్వారా పెద్ద ఎత్తున జరిగే ఆర్థిక నష్టాలను సులభంగా నివారించవచ్చు.
నకిలీ మెసేజ్లు, కాల్స్ పట్ల అప్రమత్తత
మన పేరు లేదా సంస్థ వివరాలు ఉన్న ప్రతి మెసేజ్ నిజమైనదని ఎప్పుడూ భావించకూడదు. కృత్రిమ మేధస్సుతో వ్యక్తిగత సమాచారంతో కూడిన నకిలీ మెసేజ్లను సులభంగా తయారు చేయవచ్చు కాబట్టి పంపిన వ్యక్తిని, లింక్లను ముందుగా క్షుణ్ణంగా తనిఖీ చేయాలి. అలాగే ఏఐ వాయిస్ క్లోనింగ్తో మీకు తెలిసిన బంధువులు లేదా స్నేహితుల గొంతును కూడా అచ్చం అలాగే అనుకరించి డబ్బు అడుగుతుంటారు.
వెంటనే నమ్మకుండా మీకు మాత్రమే తెలిసిన ఏదైనా ప్రశ్న అడగాలి లేదా ఇప్పటికే సేవ్ చేసిన నంబర్కు తిరిగి కాల్ చేసి నిర్ధారించుకోవడం చాలా ముఖ్యం. వీడియో కాల్స్ కనిపిస్తున్నప్పటికీ వాటిని గుడ్డిగా నమ్మకుండా తొందరపడి ఎలాంటి ఆర్థిక నిర్ణయాలు తీసుకోకుండా ఉండటం ఎప్పుడూ సురక్షితం.
ఓటీపీ భద్రత
ఎట్టి పరిస్థితుల్లోనూ ఓటీపీ, పిన్ నంబర్, పాస్వర్డ్ లేదా ఏటీఎం కార్డ్ వివరాలను ఎవరితోనూ పంచుకోకూడదు. అకౌంట్ బంద్ అయిపోతుందని భయపెట్టి వెంటనే చర్య తీసుకునేలా ఒత్తిడి చేసే వ్యక్తులను ఎప్పుడూ నమ్మకుండా కాస్త సమయం తీసుకొని నిజానిజాలను నిర్ధారించుకోవాలి. అలాగే కృత్రిమ మేధస్సుతో తయారైన ఫిషింగ్ లింకులు, నకిలీ కంపెనీ వెబ్సైట్లు అచ్చం అసలు వాటిలాగే కనిపిస్తాయి కాబట్టి అడ్రస్ను సరిగ్గా గమనించకుండా ఎట్టి పరిస్థితుల్లోనూ క్లిక్ చేయవద్దు. సోషల్ మీడియాలో కనిపించే నకిలీ ప్రమోషన్లు, భారీ లాభాలు వచ్చే పెట్టుబడి ఆఫర్లను చూసి ఆశపడి మోసపోకండి. అనుమానాస్పదంగా అనిపించిన ప్రతిసారీ వెంటనే స్పందించడం మానేసి వదిలేయడమే సైబర్ మోసాల బారిన పడకుండా ఉండేందుకు ఏకైక మార్గంగా నిలుస్తుంది.