నేటి రోజుల్లో వ్యవసాయం అనగానే అధిక సాగు ఖర్చులు, మారుతున్న వాతావరణ పరిస్థితులే గుర్తుకొస్తాయి. ఇలాంటి పరిస్థితుల్లో చిన్న, మధ్య తరహా రైతులు నష్టపోకుండా ఉండేందుకు ‘‘తక్కువ పెట్టుబడి – ఎక్కువ ఆదాయం’’ ఇచ్చే పంటల వైపు దృష్టి సారిస్తున్నారు. అయితే కేవలం దిగుబడి మాత్రమే కాకుండా.. తక్కువ వ్యవధిలో కోతకు రావడం, మార్కెట్లో నిరంతరం డిమాండ్ ఉండటం, పండించిన పంటను సులభంగా విక్రయించుకునే వెసులుబాటు ఉన్న పంటలను ఎంచుకోవడమే నిజమైన విజయం. తెలుగు రాష్ట్రాల్లోని రైతులకు తక్కువ ఖర్చుతో మంచి లాభాలను అందించే 5 ప్రధాన పంటల గురించి తెలుసుకోవడం ముఖ్యం.
కొత్తిమీర సాగు
ఆకుకూరల్లో కొత్తిమీరకు ఉండే క్రేజ్, డిమాండ్ వేరు. ప్రతి ఇంటి వంటకాల్లో, రెస్టారెంట్లలో నిత్యం వాడే కొత్తిమీర ద్వారా రైతులు వేగంగా రాబడి పొందవచ్చు. కేవలం 30 నుంచి 45 రోజుల్లోనే కోతకు వస్తుంది. చాలా చిన్న భూముల్లో లేదా అంతర పంటగా కూడా సాగు చేయవచ్చు. రైతు బజార్లు, స్థానిక కూరగాయల మార్కెట్లు, హోటళ్లు, రెస్టారెంట్లు మరియు సూపర్ మార్కెట్లకు నేరుగా విక్రయించి తక్షణ నగదు పొందవచ్చు.
మెంతి సాగు
ఆరోగ్యంపై ప్రజల్లో అవగాహన పెరుగుతుండటంతో మెంతి ఆకులకు, గింజలకు మార్కెట్లో డిమాండ్ గణనీయంగా పెరిగింది. అత్యల్ప నీటితో దీనిని సాగు చేయవచ్చు. పురుగులు, చీడపీడల ప్రభావం చాలా తక్కువగా ఉంటుంది. ప్రకృతి వ్యవసాయం చేయాలనుకునే రైతులకు ఇది సరైన ఎంపిక. స్థానిక మార్కెట్లు, ఆర్గానిక్ స్టోర్లు, కూరగాయల వ్యాపారులు, ఈ కామర్స్ ఆన్లైన్ ఫ్లాట్ఫామ్లలో విక్రయించవచ్చు.
తులసి
ఔషధ గుణాలు మెండుగా ఉన్న తులసికి ఆయుర్వేద, హర్బల్ ఉత్పత్తుల రంగంలో నిరంతరం స్థిరమైన డిమాండ్ ఉంటుంది. తులసి మొక్కలకు నిర్వహణ ఖర్చు, నీటి అవసరం చాలా తక్కువ. ఒకసారి నాటితే 3-4 నెలల్లో దిగుబడి మొదలై, నిలకడగా రాబడిని ఇస్తుంది. ఆయుర్వేద మూలికా ఉత్పత్తుల తయారీ కంపెనీలు, ఫార్మా రసాయన వ్యాపారులు, హర్బల్ ఆన్లైన్ మార్కెట్లలో ఒప్పంద ప్రాతిపదికన కూడా విక్రయించవచ్చు.
బంతి పూల సాగు
దేవాలయాలు, వివాహాలు, పండుగలు, వివిధ శుభకార్యాల్లో బంతి పూలకు ఎప్పుడూ డిమాండ్ ఉంటుంది. తక్కువ కాలంలోనే పంట చేతికి వస్తుంది. వారం వారం వరుసగా కోతలు కోస్తూ నిరంతరం చేతికి డబ్బులు వచ్చే అనుకూలత ఇందులో ఉంది. దసరా, బతుకమ్మ, దీపావళి, సంక్రాంతి సీజన్లలో వీటి ధరలు ఆకాశాన్నంటుతాయి. స్థానిక పూల మార్కెట్లు, ప్రధాన దేవాలయాలు, వెడ్డింగ్ ప్లానర్లు మరియు ఈవెంట్ మేనేజ్మెంట్ సంస్థలకు నేరుగా సరఫరా చేయవచ్చు.
మిరప సాగు
సుదీర్ఘ కాలం పాటు లాభాలను అందించే వాణిజ్య పంటల్లో మిరప ముఖ్యమైనది. దేశవ్యాప్తంగానే కాకుండా అంతర్జాతీయంగా కూడా మిరపకు మంచి ఎగుమతి అవకాశాలు ఉన్నాయి. పచ్చి మిర్చిగా లేదా ఎండబెట్టిన ఎండుమిర్చిగా అమ్ముకునే సదుపాయం ఉంది. ప్రధాన వ్యవసాయ మార్కెట్ యార్డులు, మసాలా దినుసుల ప్రాసెసింగ్ కంపెనీలు, ఎగుమతిదారులకు విక్రయించవచ్చు.
లాభదాయక సాగు కోసం ప్రధాన సూచన
సమగ్ర యాజమాన్యం: వ్యాధుల రాకముందే సమగ్ర సస్యరక్షణ చర్యలు పాటించడం ద్వారా పెట్టుబడి ఖర్చును బాగా తగ్గించవచ్చు.
మార్కెటింగ్ ప్రణాళిక: పంట వేయడానికి ముందే స్థానిక మార్కెట్లో ఉన్న డిమాండ్ను అంచనా వేసుకోవడం, వీలైతే నేరుగా వ్యాపారులతో లేదా వినియోగదారులతో అనుసంధానం కావడం ద్వారా దళారుల ప్రభావం లేకుండా పూర్తి లాభాన్ని పొందవచ్చు.