ప్రపంచంలో అత్యంత ఖరీదైన వస్తువు ఏదంటే చాలామందికి వెంటనే బంగారం, వజ్రాలు లేదా విలువైన ఆభరణాలు గుర్తుకొస్తాయి. అయితే కొన్ని ద్రవరూప పదార్థాల ధరలు మాత్రం వీటినే ఆశ్చర్యపరిచేలా ఉంటాయి. అరుదైన పదార్థాలు, వైద్య పరిశోధనల్లో వాటి ప్రాధాన్యత, తయారీకి అవసరమయ్యే భారీ ముడి పదార్థాలు, ప్రత్యేకమైన ఉత్పత్తి ప్రక్రియల కారణంగా కొన్ని ద్రవాలు లక్షలు, కోట్ల రూపాయల ధర పలుకుతున్నాయి. వీటిలో తేలు విషం అత్యంత ఖరీదైనది. చాలా మంది అరుదైన పాముల విషం ఖరీదు అనుకుంటారు కానీ తేలు విషం ఖరీదు గురించి తెలిస్తే కళ్లు బైర్లు కమ్మాల్సిందే.
తేలు విషం.. లీటరుకు రూ.100 కోట్లు?
తేలు విషం ప్రపంచంలో అత్యంత ఖరీదైన ద్రవాల్లో ఒకటిగా పేరుగాంచింది. కొన్ని నివేదికల ప్రకారం దీని ధర లీటరుకు సుమారు రూ.100 కోట్ల వరకు ఉంటుందని సమాచారం. అయితే ఇది సాధారణ మార్కెట్లో విక్రయించే ధర కాదని, అరుదైన పరిశోధనా పదార్థంగా దాని అంచనా విలువ. తేలు నుంచి విషాన్ని సేకరించడం అత్యంత క్లిష్టమైన ప్రక్రియ. ఒక్క తేలు నుంచి చాలా స్వల్ప పరిమాణంలోనే విషం లభిస్తుంది. ఈ విషంలోని ప్రత్యేక రసాయన సమ్మేళనాలపై శాస్త్రవేత్తలు క్యాన్సర్, మలేరియా తదితర వ్యాధులకు సంబంధించిన పరిశోధనలు చేస్తున్నారు. తక్కువ లభ్యత, సేకరణలోని కష్టం, శాస్త్రీయ ప్రాధాన్యత కారణంగా దీనికి భారీ విలువ ఏర్పడుతుంది.
అసలు తేలు విషాన్ని ఎలా సేకరిస్తారు?
తేలు విషం సేకరణ సాధారణ వ్యవసాయ లేదా పెంపకం ప్రక్రియ కాదు. ఇది ప్రత్యేక ప్రయోగశాల పరిస్థితుల్లో, శిక్షణ పొందిన నిపుణులు నిర్వహించే పని. శాస్త్రీయ పరిశోధనల్లో తేళ్లను నియంత్రిత పరిస్థితుల్లో ఉంచి, వాటి నుంచి విషాన్ని సేకరించే పద్ధతులు ఉపయోగిస్తారు. భారతదేశంలో నిర్వహించిన ఒక పరిశోధనలో కూడా ప్రయోగశాల పరిస్థితుల్లో తేళ్లను ఉంచి, ప్రత్యేక విద్యుత్ ప్రేరణ పద్ధతితో విషాన్ని సేకరించినట్లు శాస్త్రీయ పత్రికలో నమోదైంది. అయితే ఇది ఇంట్లో ప్రయత్నించే ప్రక్రియ కాదు. తేలు విషం నేరుగా మానవ శరీరంపై తీవ్రమైన ప్రభావాలు చూపగలదు. అందుకే సేకరణ, నిల్వ, రవాణా వంటి పనులు అనుమతులు, భద్రతా ప్రమాణాలు పాటించే పరిశోధనా సంస్థల పరిధిలోనే జరగాలి.
ఎవరు కొనుగోలు చేస్తారు?
తేలు విషానికి సాధారణ వినియోగదారుల మార్కెట్ ఉండదు. ప్రధానంగా విశ్వవిద్యాలయాలు, టాక్సిన్ పరిశోధనా ప్రయోగశాలలు, ఔషధ పరిశోధనా సంస్థలు, బయోటెక్నాలజీ కంపెనీలు వంటి సంస్థలు పరిశోధన కోసం విషంలోని నిర్దిష్ట భాగాలను ఉపయోగిస్తాయి. ప్రత్యేకంగా విషంలోని పెప్టైడ్లు, ప్రొటీన్లు, అయాన్-ఛానల్పై ప్రభావం చూపే అణువులపై పరిశోధనలు జరుగుతున్నాయి. క్యాన్సర్ కణాలపై కొన్ని విష సమ్మేళనాలు ప్రయోగశాల, జంతు నమూనాల్లో ప్రభావం చూపినట్లు పరిశోధనలు సూచిస్తున్నాయి.
ఏ దేశాల్లో ఈ పరిశోధన ఎక్కువగా జరుగుతుంది?
తేలు విషంపై పరిశోధన ఒక్క దేశానికే పరిమితం కాలేదు. అమెరికా, చైనా, భారత్, సింగపూర్, ఈజిప్ట్ తదితర దేశాల్లోని విశ్వవిద్యాలయాలు, వైద్య, బయోటెక్నాలజీ పరిశోధనా సంస్థలు వివిధ తేలు జాతుల విషాన్ని అధ్యయనం చేస్తున్నాయి. ఉదాహరణకు, నేషనల్ యూనివర్సిటీ ఆఫ్ సింగపూర్కు చెందిన పరిశోధకులు తేలు విషంలోని యాంటీక్యాన్సర్ అవకాశాలను అధ్యయనం చేశారు.
బిజినెస్ చేయాలంటే ఏంటి పరిస్థితి?
ఇది సాధారణంగా తేళ్లు పట్టి విషం అమ్మే వ్యాపారం కాదు. పరిశోధనా సంస్థలకు సరఫరా చేయాలంటే జంతువుల నిర్వహణ, విష పదార్థాల భద్రత, ప్రయోగశాల ప్రమాణాలు, రవాణా, స్థానిక వన్యప్రాణి, బయోసేఫ్టీ నిబంధనలు వంటి అనేక అంశాలు వర్తించవచ్చు. దేశాన్ని బట్టి చట్టాలు కూడా మారుతాయి.