మనసులోని కోరికలు నెరవేరాలని భక్తులు భగవంతుడికి మొక్కులు మొక్కుకోవడం సనాతన సంప్రదాయంలో ఎంతోకాలంగా కొనసాగుతున్న ఆచారం. ఆరోగ్యం, ఉద్యోగం, వివాహం, సంతానం, విద్య, కుటుంబ శ్రేయస్సు వంటి ఎన్నో కోరికలతో భక్తులు దేవాలయాల్లో లేదా తమ ఇష్టదైవం ముందు మొక్కులు పెట్టుకుంటారు. కోరిక నెరవేరిన తర్వాత ఆ మొక్కును చెల్లించడం తమ కర్తవ్యంగా భావిస్తారు. అయితే జీవితంలో కొన్ని అనివార్య పరిస్థితులు ఎదురవుతుంటాయి. అనారోగ్యం, ఆర్థిక ఇబ్బందులు, ప్రయాణ సమస్యలు లేదా ఇతర కారణాల వల్ల మొక్కు వెంటనే తీర్చుకునే అవకాశం లేకపోవచ్చు. ఇలాంటి సమయంలో చాలా మంది మొక్కు తీర్చకపోతే దేవుడు కోపిస్తాడా?, ఏదైనా అపశకునం జరుగుతుందా? అనే భయంతో ఆందోళన చెందుతుంటారు. ఈ సందేహానికి ప్రముఖ ఆధ్యాత్మిక ప్రవచన కర్త కాకునూరి సూర్యనారాయణమూర్తి స్పష్టమైన సమాధానం చెబుతున్నారు.
భగవంతుడు భక్తి, నిజాయితీని చూస్తాడు
ఆయన వివరణ ప్రకారం, భగవంతుడు ఎప్పుడూ భక్తుడి అంతరంగాన్ని, నిజాయితీని, పరిస్థితులను పరిగణనలోకి తీసుకుంటాడు. మనిషి ఎదుర్కొంటున్న కష్టాలను అర్థం చేసుకునే కరుణామూర్తి అయిన భగవంతుడు, కేవలం ఒక మొక్కు ఆలస్యమైందనే కారణంతో ఆగ్రహించడు. అందువల్ల అనివార్య పరిస్థితుల వల్ల మొక్కు వెంటనే తీర్చలేకపోయినా భయపడాల్సిన అవసరం లేదని సూచిస్తున్నారు.
ఆలస్యమైతే ఇలా ప్రార్థించండి
ఏదైనా కారణంతో మొక్కు చెల్లించడం సాధ్యం కాకపోతే ఇంట్లోని పూజామందిరంలో లేదా దేవాలయంలో భగవంతుడి ముందు నిలబడి, ప్రస్తుతం ఈ మొక్కు తీర్చుకునే పరిస్థితి లేదు. అవకాశం వచ్చిన వెంటనే తప్పకుండా చెల్లించుకుంటాను అని మనస్ఫూర్తిగా ప్రార్థించవచ్చని చెబుతున్నారు. భక్తుని హృదయపూర్వక సంకల్పాన్ని భగవంతుడు తప్పకుండా స్వీకరిస్తాడని ఆయన పేర్కొంటున్నారు.
ఇవి కూడా చదవండి
అదే దేవుడి సమీప ఆలయంలో మొక్కు తీర్చుకోవచ్చు
ఉదాహరణకు తిరుమల శ్రీ వేంకటేశ్వర స్వామి దర్శనానికి వస్తానని మొక్కుకుని, ఏదైనా కారణంతో తిరుపతికి వెళ్లలేని పరిస్థితి ఏర్పడితే, ఇంటికి సమీపంలో ఉన్న శ్రీ వేంకటేశ్వర స్వామి ఆలయాన్ని దర్శించి మొక్కు తీర్చుకోవచ్చని వివరిస్తున్నారు. ఎందుకంటే దైవశక్తి ఒకే రూపంలో అన్ని ఆలయాల్లోనూ ఉంటుందని, భక్తి భావమే ముఖ్యమని ఆయన చెబుతున్నారు. దేవుడు స్థలాన్ని కాదు, భక్తుడి విశ్వాసాన్ని చూస్తాడని ఆధ్యాత్మికంగా వివరించారు.
దానం కూడా మొక్కు తీర్చుకున్నట్లే
ఒకవేళ అన్నదానం, వస్త్రదానం లేదా సేవా కార్యక్రమాలు చేస్తానని మొక్కుకుని, ఆలయంలో అవి నిర్వహించడం సాధ్యం కాకపోతే అవసరమైన పేదలకు భోజనం పెట్టడం, దుస్తులు అందించడం, నిరుపేదలకు సహాయం చేయడం ద్వారా కూడా ఆ మొక్కును నెరవేర్చుకోవచ్చని సూచిస్తున్నారు. శాస్త్రాల ప్రకారం “మానవ సేవే మాధవ సేవ” అనే భావన ఎంతో గొప్పది. ఆర్తులకు చేసిన సేవ, ఆకలితో ఉన్నవారికి అన్నం పెట్టడం, అవసరమైన వారికి సహాయం చేయడం భగవంతునికే సమర్పించిన సేవగా పరిగణించబడుతుంది.
భయం కాదు… భక్తి ముఖ్యం
ఆధ్యాత్మిక దృష్టిలో చూస్తే మొక్కు అనేది భగవంతుడితో చేసే వ్యాపారం కాదు. అది భక్తుడు చేసే పవిత్ర సంకల్పం. అందువల్ల పరిస్థితులు అనుకూలించిన వెంటనే మొక్కు తీర్చుకోవాలనే చిత్తశుద్ధి ఉంటే చాలు. ఆలస్యం జరిగినంత మాత్రాన దేవుడు శిక్షిస్తాడని లేదా ఆగ్రహిస్తాడని భయపడాల్సిన అవసరం లేదు. నిజమైన భక్తి, విశ్వాసం, వినయం, దైవంపై నమ్మకం ఉంటే భగవంతుడు భక్తుడి మనసును అర్థం చేసుకుని అనుగ్రహిస్తాడని ఆధ్యాత్మిక నిపుణులు సూచిస్తున్నారు.
(Disclaimer: ఈ కథనంలో పొందుపరిచిన అంశాలు హిందూ ఆధ్యాత్మిక విశ్వాసాలు, సంప్రదాయాలు, ఆధ్యాత్మిక ప్రవచనకర్త కాకునూరి సూర్యనారాయణమూర్తి వెల్లడించిన అభిప్రాయాల ఆధారంగా రూపొందించబడ్డాయి. ఇవి వ్యక్తిగత విశ్వాసాలకు సంబంధించినవి మాత్రమే. వీటిని శాస్త్రీయంగా లేదా సార్వత్రిక సత్యాలుగా భావించరాదు. పాఠకులు తమ వ్యక్తిగత విశ్వాసాలు, కుటుంబ సంప్రదాయాలు, గురువులు లేదా సంబంధిత ఆధ్యాత్మిక పండితుల సూచనల మేరకు నిర్ణయాలు తీసుకోవడం మంచిది.)