Early Warning Signs of Lung Cancer Telugu: వేగంగా బరువు తగ్గడం, ఆకలి తగ్గిపోవడం, మూడు వారాలకు పైగా దగ్గు కొనసాగడం వంటి లక్షణాలను ఎట్టి పరిస్థితుల్లోనూ నిర్లక్ష్యం చేయకూడదని వైద్య నిపుణులు హెచ్చరిస్తున్నారు. చాలామంది వీటిని సాధారణ వైరల్ ఇన్ఫెక్షన్, అలర్జీ లేదా వాతావరణ మార్పుల ప్రభావంగా భావించి పట్టించుకోరు. అయితే, ఈ లక్షణాలు పదేపదే కనిపించడం లేదా చికిత్స తీసుకున్నప్పటికీ తగ్గకపోవడం ఊపిరితిత్తుల క్యాన్సర్కు తొలి సంకేతాలు కావచ్చని నిపుణులు చెబుతున్నారు. మాక్స్ పట్పర్గంజ్ హాస్పిటల్లోని మెడికల్ ఆంకాలజీ విభాగానికి చెందిన డాక్టర్ సమీర్ ఖత్రి మాట్లాడుతూ.. ఊపిరితిత్తుల క్యాన్సర్ ప్రారంభ దశలో కనిపించే లక్షణాలు సాధారణ శ్వాసకోశ ఇన్ఫెక్షన్ లక్షణాలతో పోలి ఉండటమే పెద్ద సవాలని తెలిపారు. దీంతో చాలా మంది రోగులు వ్యాధి ముదిరిన తర్వాతే వైద్యులను సంప్రదిస్తారని చెప్పారు.
ఈ లక్షణాలు ఉంటే వెంటనే వైద్యుడిని సంప్రదించండి
- మూడు వారాలకు మించి కొనసాగే దగ్గు
- చాలాకాలంగా ఉన్న దగ్గు ఒక్కసారిగా తీవ్రమవడం లేదా స్వభావం మారడం
- దగ్గినప్పుడు కొద్దిపాటి రక్తం రావడం
- తరచూ న్యుమోనియా లేదా ఛాతీ ఇన్ఫెక్షన్లు రావడం
- శ్వాస తీసుకోవడంలో ఇబ్బంది లేదా చిన్న పనికే ఆయాసం రావడం
- నిరంతర ఛాతీ నొప్పి లేదా ఛాతీ బరువుగా అనిపించడం
- గొంతు బొంగురుపోవడం లేదా స్వరం మారిపోవడం
- కారణం లేకుండా వేగంగా బరువు తగ్గడం
- నిరంతరంగా ఆకలి తగ్గిపోవడం
ధూమపానం చేయనివారికీ ప్రమాదం ఉంది
ఊపిరితిత్తుల క్యాన్సర్ కేవలం ధూమపానం చేసేవారికే వస్తుందనుకోవడం పొరపాటని వైద్యులు చెబుతున్నారు. ధూమపానం ప్రధాన ప్రమాద కారకమే అయినప్పటికీ, పరోక్ష ధూమపానం (Passive Smoking), తీవ్ర వాయు కాలుష్యం, కొన్ని పారిశ్రామిక రసాయనాలకు ఎక్కువకాలం గురికావడం, కుటుంబంలో క్యాన్సర్ చరిత్ర ఉండటం వంటి కారణాలు కూడా ఈ వ్యాధి ప్రమాదాన్ని పెంచుతాయి. ఇటీవల ధూమపానం చేయని వారిలోనూ ఊపిరితిత్తుల క్యాన్సర్ కేసులు పెరుగుతున్నాయని నిపుణులు పేర్కొంటున్నారు.
ప్రతి దగ్గు క్యాన్సర్ కాదు.. కానీ నిర్లక్ష్యం చేయొద్దు
ప్రతి దీర్ఘకాలిక దగ్గు క్యాన్సర్ను సూచించదని వైద్యులు స్పష్టం చేస్తున్నారు. అయితే మూడు వారాలకు మించి దగ్గు కొనసాగినా, మందులు వాడినప్పటికీ తగ్గకపోయినా, పదేపదే ఇలాంటి సమస్యలు వస్తున్నా తప్పకుండా వైద్యుడిని సంప్రదించాలని సూచిస్తున్నారు. అవసరమైతే ఛాతీ ఎక్స్రే, సీటీ స్కాన్ లేదా ఇతర పరీక్షల ద్వారా అసలు కారణాన్ని గుర్తించవచ్చు.
తొలిదశలో గుర్తిస్తే చికిత్స విజయవంతమవుతుంది
ప్రస్తుతం ఊపిరితిత్తుల క్యాన్సర్ చికిత్సలో వైద్య రంగం గణనీయమైన పురోగతి సాధించింది. వ్యాధిని ప్రారంభ దశలోనే గుర్తిస్తే చికిత్స ఫలితాలు మెరుగ్గా ఉంటాయి. సరైన సమయంలో చికిత్స ప్రారంభిస్తే చాలా మంది రోగులు సాధారణ, చురుకైన, దీర్ఘకాల జీవితం గడపగలుగుతున్నారని నిపుణులు చెబుతున్నారు.
(Disclaimer: ఈ కథనం ఆరోగ్య అవగాహన కోసం మాత్రమే. ఇందులో పేర్కొన్న లక్షణాలు కనిపిస్తే స్వయంగా నిర్ధారణకు రావద్దు. అర్హత కలిగిన వైద్యుడిని సంప్రదించి అవసరమైన పరీక్షలు చేయించుకోవడం ఉత్తమం.)