కావలసిన పదార్థాలు.. బెండకాయలు – 250 గ్రాములు, టమాటాలు 4, ఎండుమిరపకాయలు 15 (లేదా కారానికి తగినంత), పచ్చిశనగపప్పు 1 టేబుల్ స్పూన్, ధనియాలు 1/2 టీ స్పూన్, జీలకర్ర 1 టీ స్పూన్, కరివేపాకు గుప్పెడు, చింతపండు చిన్న ఉసిరికాయ సైజు, నూనె 2 టేబుల్ స్పూన్లు, ఉప్పు రుచికి సరిపడా, వెల్లుల్లి రెబ్బలు 8, తాలింపు గింజలు (ఆవాలు, జీలకర్ర) 1 టీ స్పూన్, ఎండుమిర్చి 2 (తాలింపు కోసం) తీసుకోవాలి.
ముందుగా స్టవ్ మీద ఒక పాన్ పెట్టుకొని, ఒక టేబుల్ స్పూన్ నూనె వేసుకోవాలి. నూనె వేడి అయిన తర్వాత, 15 ఎండుమిరపకాయలను చిన్న చిన్న ముక్కలుగా కట్ చేసుకొని వేయాలి. ఆ తరువాత, ఒక టేబుల్ స్పూన్ పచ్చిశనగపప్పు, ఒక టీ స్పూన్ జీలకర్ర, అర టీ స్పూన్ ధనియాలు, మరియు మూడు రెమ్మల కరివేపాకు వేసుకోవాలి. ఈ బెండకాయ పచ్చడిలో కరివేపాకు ఎక్కువ వేసుకుంటే మరింత రుచిగా ఉంటుంది. మీడియం ఫ్లేమ్ లో అన్ని దినుసులు మంచి సువాసన వచ్చేవరకు, ఎండుమిర్చి క్రిస్పీగా అయ్యేవరకు వేయించుకోవాలి. మీరు తినే కారాన్ని బట్టి ఎండుమిరపకాయలను ఎక్కువ లేదా తక్కువ చేసుకోవచ్చు. వేగిన తరువాత, వాటిని ఒక ప్లేట్ లోకి తీసుకొని పక్కన పెట్టుకోవాలి.
ఇప్పుడు అదే పాన్ లో మరో టీ స్పూన్ నూనె వేసుకోవాలి. 250 గ్రాముల బెండకాయలను మూడు, నాలుగు సార్లు శుభ్రంగా కడిగి, తడి లేకుండా తుడిచి, చిన్న చిన్న ముక్కలుగా కట్ చేసుకొని పాన్ లో వేసుకోవాలి. బెండకాయ ముక్కలను మీడియం ఫ్లేమ్ లో జిగురు లేకుండా బాగా ఫ్రై చేయాలి. బెండకాయ ఈ విధంగా చక్కగా వేగిన తర్వాత, వాటిని కూడా ప్లేట్ లోకి తీసుకొని పక్కన పెట్టుకోవాలి. అదే పాన్ లో, చిన్న చిన్న ముక్కలుగా కట్ చేసుకున్న నాలుగు టమాటా ముక్కలు, టమాటా త్వరగా మగ్గడానికి కొద్దిగా ఉప్పు, చిన్న ఉసిరికాయ సైజు చింతపండు వేసుకోవాలి. ఒకసారి బాగా కలుపుకున్న తర్వాత, మూత పెట్టుకొని టమాటాలను మెత్తగా మగ్గనివ్వాలి. టమాటాలు ఇలా మెత్తగా మగ్గిపోయిన తర్వాత, ఒకసారి కలుపుకొని స్టవ్ ఆఫ్ చేసి చల్లారనివ్వాలి.
ఇప్పుడు ఒక మిక్సీ జార్ తీసుకొని, అందులో ముందుగా వేయించుకున్న ఎండుమిరపకాయల దినుసులు, 8 వెల్లుల్లి రెబ్బలు, రుచికి సరిపడా ఉప్పు వేసుకొని మెత్తగా మిక్సీ చేసుకోవాలి. ఇలా మెత్తగా అయిన తర్వాత, అందులో ముందుగా మగ్గించుకున్న టమాటా మిశ్రమాన్ని వేసుకోవాలి. మిక్సీ జార్ మూత పెట్టుకొని మెత్తగా గ్రైండ్ చేసుకోవాలి. చివరిగా, ముందుగా ఫ్రై చేసుకున్న బెండకాయ ముక్కలను వేసుకొని ఒక్కసారి మాత్రమే తిప్పుకోవాలి. బెండకాయ ముక్కలను ఇలా చివరిలో వేసుకుంటేనే పచ్చడి రుచిగా ఉంటుంది, మరీ మెత్తగా నలిగిపోకుండా కాస్త బరకగా ఉంటుంది. ఇక్కడ చూపించినట్లుగా ఈ బెండకాయ పచ్చడిని కొంచెం బరకగా చేసుకుంటే రుచి అద్భుతంగా ఉంటుంది. ఈ పచ్చడిని ఒక బౌల్ లోకి తీసుకొని పక్కన పెట్టుకోవాలి.
తరువాత, స్టవ్ మీద చిన్న పాన్ పెట్టుకొని అందులో ఒక టేబుల్ స్పూన్ నూనె వేసుకోవాలి. నూనె వేడి అయిన తర్వాత, ఒక టీ స్పూన్ తాలింపు గింజలు, రెండు ఎండు మిరపకాయలు, ఒక రెమ్మ కరివేపాకు వేసుకొని వేయించుకోవాలి. తాలింపు అంతా వేగిన తర్వాత, దానిని తయారుచేసుకున్న బెండకాయ పచ్చడిలో వేసుకొని బాగా కలుపుకోవాలి. ఈ బెండకాయ పచ్చడిని ఫ్రిడ్జ్ లో స్టోర్ చేసుకుంటే వారం రోజుల పాటు తాజాగా ఉంటుంది. మనకు చాలా రుచికరమైన బెండకాయ పచ్చడి రెడీ అయిపోయింది. ఇప్పుడు ఈ పచ్చడిని వేడివేడి అన్నంలో నెయ్యి వేసుకొని, ఇంకా ఉల్లిపాయ ముక్కలతో కలిపి సర్వ్ చేసుకుంటే ఎంతో రుచిగా, సింపుల్ గా చేసుకునే బెండకాయ పచ్చడిని మీరు ఆస్వాదించవచ్చు.