కతిహార్: శారీరక వైకల్యం తన కలలకు అడ్డంకి కాదని ఓ చిన్నారి నిరూపిస్తోంది. రెండు చేతులు లేకపోయినా.. కాళ్లనే తన చేతులుగా మార్చుకుని పాఠాలు రాస్తూ, చదువుకుంటూ ముందుకు సాగుతోంది. బీహార్లోని కతిహార్ జిల్లాకు చెందిన నాలుగో తరగతి విద్యార్థిని లక్ష్మి పట్టుదల, ఆత్మవిశ్వాసం ఇప్పుడు అందరికీ స్ఫూర్తిగా నిలుస్తోంది.
హసన్గంజ్ బ్లాక్లోని భటౌరియా ఉన్నత మాధ్యమిక పాఠశాలలో లక్ష్మి నాలుగో తరగతి చదువుతోంది. పుట్టుకతోనే రెండు చేతులు లేకపోయినా.. చదువుపై ఆమె ఆసక్తి మాత్రం ఏమాత్రం తగ్గలేదు. ప్రతిరోజూ పాఠశాలకు వెళ్లే లక్ష్మి.. కాళ్ల సహాయంతో పెన్ను పట్టుకుని అక్షరాలు రాస్తుంది. సాధారణ విద్యార్థుల మాదిరిగానే పాఠాలను నేర్చుకుంటూ, ఉపాధ్యాయులు చెప్పే విషయాలను శ్రద్ధగా వింటోంది.
ఉపాధ్యాయురాలు కావాలన్నదే లక్ష్యం
లక్ష్మికి భవిష్యత్తుపై స్పష్టమైన లక్ష్యం ఉంది. బాగా చదువుకుని ఉపాధ్యాయురాలిగా మారాలని ఆమె కోరుకుంటోంది. తాను చదువును కొనసాగించి.. భవిష్యత్తులో పిల్లలకు పాఠాలు చెప్పే స్థాయికి ఎదగాలనేది ఆమె కల. తన ముందున్న శారీరక సవాళ్లను పట్టించుకోకుండా లక్ష్యసాధన దిశగా అడుగులు వేస్తోంది.
కూలీ పనులు చేస్తూ తల్లిదండ్రుల పోరాటం
లక్ష్మి తండ్రి రామ్దేవ్ యాదవ్ కూలీగా పనిచేస్తుండగా.. తల్లి రేణు దేవి గృహిణి. వారికి ముగ్గురు కుమార్తెలు, ఒక కుమారుడు ఉన్నారు. కుటుంబంలో ఆర్థిక ఇబ్బందులు ఉన్నప్పటికీ.. లక్ష్మి చదువుకు తల్లిదండ్రులు ఎప్పుడూ అడ్డుపడలేదు. ఆమెను పాఠశాలకు పంపిస్తూ చదువుకునేలా ప్రోత్సహిస్తున్నారు. లక్ష్మి పుట్టిన తర్వాత కొందరు ఆమెను వదిలేయాలని సూచించినప్పటికీ.. తల్లిదండ్రులు ఆ మాటలను పట్టించుకోలేదు. తమ కుమార్తెను అక్కున చేర్చుకుని, ఆమెకు లక్ష్మి అని పేరు పెట్టారు. తాము చదువుకోకపోయినా.. తమ పిల్లలు మాత్రం చదువుకుని జీవితంలో ఎదగాలనే ఉద్దేశంతో ఆమెకు అండగా నిలుస్తున్నారు.
ప్రభుత్వ సాయం కోసం ఎదురుచూపులు
లక్ష్మికి శారీరక వైకల్యం ఉన్నప్పటికీ ఇప్పటివరకు ప్రభుత్వ పథకాల ద్వారా తగిన సహాయం అందలేదని కుటుంబ సభ్యులు చెబుతున్నారు. చదువుతో పాటు దివ్యాంగులకు అందాల్సిన ప్రభుత్వ ప్రయోజనాలు కూడా ఆమెకు అందించాలని తల్లి కోరుతోంది. సరైన సహాయం లభిస్తే లక్ష్మి తన చదువును మరింత ముందుకు తీసుకెళ్లగలదని కుటుంబం ఆశిస్తోంది.
ఉపాధ్యాయుల అండ
లక్ష్మి పట్టుదలను చూసి పాఠశాల ఉపాధ్యాయులు కూడా ఆమెకు పూర్తి సహకారం అందిస్తున్నారు. చదువులో ఇబ్బందులు ఎదురైనప్పుడు అవసరమైన సహాయం చేస్తూ ఆమె ఆత్మవిశ్వాసాన్ని పెంచుతున్నారు. ఇతర విద్యార్థులతో సమానంగా చదువుకునేలా ప్రోత్సహిస్తున్నారు. రెండు చేతులు లేకపోయినా.. తన కాళ్లతో అక్షరాలు రాస్తూ భవిష్యత్తును నిర్మించుకుంటున్న లక్ష్మి కథ నిజంగా స్ఫూర్తిదాయకం. సాధించాలనే సంకల్పం ఉంటే శారీరక పరిమితులు కూడా కలల ముందు చిన్నవేనని లక్ష్మి తన పట్టుదలతో నిరూపిస్తోంది. ఆమె ఉపాధ్యాయురాలు కావాలనే కల నెరవేరేందుకు కుటుంబం, పాఠశాల, ప్రభుత్వం నుంచి మరింత సహకారం అందాల్సిన అవసరం ఉంది.
మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి..