Hyderabad Airport: డూప్లికేట్ విమాన టికెట్లతో దుబాయ్ వెళ్లేందుకు ప్రయత్నించిన ఇద్దరు నేపాలీయులను శంషాబాద్ పోలీసులు అదుపులోకి తీసుకున్నారు. హైదరాబాద్లోని రాజీవ్ గాంధీ అంతర్జాతీయ విమానాశ్రయంలో ఈ ఘటన చోటుచేసుకుంది. ప్రయాణికుల పత్రాలను తనిఖీ చేసే సమయంలో ఎయిర్లైన్ సిబ్బంది అప్రమత్తంగా వ్యవహరించడంతో ఈ వ్యవహారం వెలుగులోకి వచ్చింది. పోలీసుల కథనం ప్రకారం.. ఇద్దరు నేపాలీయులు దుబాయ్ వెళ్లేందుకు రాజీవ్ గాంధీ అంతర్జాతీయ విమానాశ్రయానికి చేరుకున్నారు. బోర్డింగ్కు ముందు ఎయిర్లైన్ సిబ్బంది వారి పాస్పోర్టులు, వీసాలు, విమాన టికెట్లు తదితర ప్రయాణ పత్రాలను సాధారణ విధానంలో పరిశీలించారు. ఈ క్రమంలో వారు సమర్పించిన టికెట్లు అసలైనవి కాదని, డూప్లికేట్ టికెట్లు అని గుర్తించారు. టికెట్లలోని వివరాలను ఎయిర్లైన్ రికార్డులతో సరిపోల్చి చూడగా వ్యత్యాసాలు ఉన్నట్లు తేలింది. అనుమానం వచ్చిన వెంటనే ఎయిర్లైన్ అధికారులు రాజీవ్ గాంధీ అంతర్జాతీయ విమానాశ్రయం పోలీసులకు సమాచారం అందించారు.
స్పందించిన పోలీసులు ఇద్దరు ప్రయాణికులను అదుపులోకి తీసుకుని విచారణ చేపట్టారు. అనంతరం వారిని శంషాబాద్ పోలీసులకు అప్పగించారు. ఈ ఘటనపై కేసు నమోదు చేసిన శంషాబాద్ పోలీసులు దర్యాప్తు ప్రారంభించారు. డూప్లికేట్ టికెట్లు వారికి ఎక్కడి నుంచి వచ్చాయి? వాటిని ఎవరు సమకూర్చారు? ఈ వ్యవహారంలో ఏవైనా ట్రావెల్ ఏజెంట్లు లేదా అంతర్రాష్ట్ర మోసగాళ్ల ముఠాల ప్రమేయం ఉందా? అనే కోణాల్లో విచారణ కొనసాగిస్తున్నారు. ప్రయాణికులు ఉద్దేశపూర్వకంగానే నకిలీ టికెట్లతో ప్రయాణించేందుకు ప్రయత్నించారా? లేక మోసపోయారా? అనే అంశాలపైనా ఆరా తీస్తున్నారు.
విమానాశ్రయాల్లో భద్రతా ప్రమాణాల్లో భాగంగా ప్రయాణికుల టికెట్లు, పాస్పోర్టులు, వీసాలు, ఇతర ప్రయాణ పత్రాలను పలు దశల్లో తనిఖీ చేస్తారని అధికారులు తెలిపారు. ఈ క్రమంలోనే డూప్లికేట్ టికెట్లు బయటపడటంతో ఎలాంటి అవాంఛనీయ ఘటన జరగకుండా ముందుగానే అడ్డుకోగలిగినట్లు పేర్కొన్నారు. ఈ ఘటనకు సంబంధించిన పూర్తి వివరాలు దర్యాప్తు అనంతరం వెల్లడయ్యే అవకాశం ఉందని పోలీసులు తెలిపారు. అనంతరం విడుదల అయ్యే అవకాశం ఉన్నట్టు అధికారులు చెబుతున్నారు.