సాధారణంగా చనిపోయిన పాముతో ఎటువంటి ప్రమాదం ఉండదని చాలామంది భావిస్తారు. అయితే చనిపోయిన పాము కూడా సజీవంగా ఉన్న పాముతో సమానమైన ప్రమాదాన్ని కలిగిస్తుందని సర్ప నిపుణులు హెచ్చరిస్తున్నారు. పాము చనిపోయిన తర్వాత లేదా దాని తల నరికినప్పటికీ, దాని నాడీ వ్యవస్థ కొన్ని గంటల పాటు స్వయం ప్రతిపత్తితో పనిచేస్తుంది. చనిపోయిన పాము దగ్గరకు వెళ్లినప్పుడు లేదా దానిని తాకినప్పుడు అది అసంకల్పిత ప్రతీకార చర్యగా కరిచే అవకాశం ఉంది. అంతేకాకుండా, చనిపోయినప్పటికీ దాని విష గ్రంథులలో విషం పవర్ఫుల్గానే ఉంటుంది. పూర్తి వివరాల్లోకి వెళితే..
చనిపోయిన తర్వాత కూడా ఎలా కరుస్తుంది?
పాములు సరీసృపాలు కావడం వల్ల వాటి నాడీ వ్యవస్థ, శరీర నిర్మాణం మానవులు, ఇతర క్షీరదాల కంటే భిన్నంగా ఉంటుంది. పాము చనిపోయిన తర్వాత లేదా దాని తల శరీరం నుండి వేరు చేయబడినప్పటికీ, దాని మెదడు, నరాల వ్యవస్థ కొన్ని గంటల పాటు రిఫ్లెక్స్ చర్యలను కలిగి ఉంటుంది. దీనివల్ల చనిపోయిన పాము శరీరాన్ని లేదా తలను ఏదైనా వస్తువుతో తాకినప్పుడు లేదా దాని దగ్గరకు వెళ్లినప్పుడు, అది ముప్పుగా భావించి అసంకల్పిత ప్రతీకార చర్యగా వెంటనే కరుస్తుంది.
విష గ్రంథులు అలాగే ఉంటాయి!
పాము ప్రాణాలు కోల్పోయినప్పటికీ, దాని కోరల వెనుక ఉండే విష గ్రంథులలో విషం ఏ మాత్రం తగ్గదు. పాము రిఫ్లెక్స్ చర్యతో కరిచినప్పుడు ఆ విషం కోరల ద్వారా మనుషుల రక్తంలోకి ప్రవేశిస్తుంది. ఇది ప్రాణాపాయానికి దారితీస్తుంది. అనేక సందర్భాల్లో నరికివేసిన పాము తలలు కూడా మనుషులను కరిచి ఆసుపత్రి పాలైన ఘటనలు నమోదయ్యాయి. చనిపోయిన పాము శరీర భాగాన్ని తాకినప్పుడు స్వయం ప్రతిపత్తి రిఫ్లెక్స్ వల్ల అది అకస్మాత్తుగా కరుస్తుంది. కోరలలో ఉండే విష గ్రంథుల నుండి పవర్ఫుల్ విషం శరీరంలోకి వెళ్లి తీవ్ర ముప్పు కలిగిస్తుంది.
ఇవి కూడా చదవండి
పాము చనిపోతే ఏం చేయాలి?
చనిపోయిన పామును ఎట్టి పరిస్థితుల్లోనూ చేతులతో తాకకూడదు. దాని తలను తొలగించినప్పటికీ, ఆ తలకు దూరంగా ఉండటం మంచిది. చనిపోయిన పామును తొలగించడానికి కర్రలు లేదా పొడవైన పరికరాలను ఉపయోగించాలి. లేదా స్నేక్ క్యాచర్లకు సమాచారం అందించాలి.