పరిమితంగా నీరు పోయండి- వర్షాకాలంలో గాలిలో తేమ ఎక్కువగా ఉంటుంది. పైగా వర్షపు నీరు కూడా అందుతుంది. కాబట్టి, మొక్కలకు రోజూ ఎక్కువ నీరు పోయాల్సిన అవసరం లేదు. మోతాదుకు మించి నీరు పోస్తే వేర్లు కుళ్ళిపోయి, మొక్క క్షీణిస్తుంది. కుండీలోని మట్టి పైపొర ఆరిపోయినట్లు అనిపించినప్పుడు మాత్రమే నీరు అందించండి.
పాడైన ఆకులు, పువ్వులను కత్తిరించండి – వర్షాకాలంలో గాలిలోని అధిక తేమ వల్ల ఫంగల్ వ్యాధులు వేగంగా వ్యాపిస్తాయి. అందువల్ల ఎండిపోయిన పువ్వులు, పసుపు రంగులోకి మారిన లేదా పాడైన ఆకులను ఎప్పటికప్పుడు కత్తిరించి తొలగించాలి. దీనివల్ల మొక్క శుభ్రంగా ఉండటమే కాకుండా కొత్త మొగ్గలు రావడానికి అవసరమైన శక్తి లభిస్తుంది.
తగినంత సూర్యరశ్మిని అందించండి- రైన్ సీజన్లో ఆకాశం మేఘావృతమై ఉండటం వల్ల ఎండ తక్కువగా ఉంటుంది. కానీ, గులాబీలు పూలు పూయడానికి సూర్యరశ్మి చాలా కీలకం. కాబట్టి ఎప్పుడు కొద్దిగా ఎండ వచ్చినా, ఆ వెలుతురు మొక్కలకు సరిగ్గా తగిలేలా చూసుకోండి. అవసరమైతే కుండీలను ఎండ పడే ప్రదేశంలోకి మార్చండి.
మట్టిలో నీరు నిలువకుండా చూసుకోండి- గులాబీ వేర్లు బలంగా, ఆరోగ్యంగా పెరగాలంటే మట్టి వదులుగా ఉండాలి. కుండీల్లో నీరు నిలిచిపోకుండా కింద ఉండే డ్రైనేజీ రంధ్రాలు సరిగ్గా ఉన్నాయో లేదో చూసుకోండి. వర్షపు నీరు కుండీలో గడ్డకట్టకుండా మట్టిని అప్పుడప్పుడు వదులు చేస్తూ ఉంటే వేర్లకు ఆక్సిజన్ బాగా అందుతుంది.
ఫంగల్ ఇన్ఫెక్షన్ల నుండి రక్షించండి- వర్షాకాలంలో ఆకుల అడుగు భాగం లేదా కొత్తగా వచ్చే చిగుళ్లపై నల్లటి మచ్చలు, ఫంగస్ చేరే అవకాశం ఉంది. కాబట్టి క్రమం తప్పకుండా మొక్కలను పరిశీలిస్తూ ఉండండి. ఏవైనా తెగుళ్ల సంకేతాలు కనిపిస్తే వెంటనే వేపనూనె లేదా తగిన ఆర్గానిక్ ఫంగిసైడ్ను స్ప్రే చేసి మొక్కను సురక్షితంగా ఉంచండి. ఈ చిన్నపాటి జాగ్రత్తలు పాటిస్తే, మీ గార్డెన్లో గులాబీ మొక్కలు వర్షాకాలం అంతా రంగురంగుల పూలతో నవ్వుతూ మీ మనస్సును ఆహ్లాదపరుస్తాయి!