ఆధార్ కార్డు ఎంత ముఖ్యమైన డాక్యుమెంట్ అనేది ప్రత్యేకంగా చెప్పనక్కర్లేదు. ఏ ప్రభుత్వ పథకం కింద లబ్ది పొందాలన్నా, సిమ్ కార్డు తీసుకోవాలన్నా, బ్యాంక్ అకౌంట్ ఓపెన్ చేయాలన్నా, మీ పిల్లలను స్కూల్లో చేర్పించాలన్నా.. ఇలా ఏ పనికైనా ముందుగా ఆధార్ కార్డు అడుగుతారు. అయితే కొంతమంది ఆధార్ కార్డుల్లో ఫొటో సరిగ్గా ఉండదు. ఎప్పుడో ఆధార్ కార్డు తీసుకున్నప్పటి ఫొటో ఉంటుంది. వయస్సు పెరిగే కొద్ది శరీరంలో అనేక మార్పులు వస్తూ ఉంటాయి. దీంతో మీ మొఖం రూపం కూడా మారుతూ ఉంటుంది. ఇలాంటప్పుడు ఆధార్ కార్డులో ఉన్న ఫొటోతో చూసి ప్రస్తుత మనిషిని గుర్తించడంలో సమస్యలు ఎదురవుతాయి.
ఉచితంగా ఆధార్ ఫొటో అప్డేట్ చేసుకోవచ్చా..?
ఇక కొంతమంది ఆధార్ కార్డుల్లో ఫొటో సరిగ్గా ఉండదు. ఫొటో స్పష్టంగా కనిపించదు. ఇలాంటి సమయంలో ఫొటోను మార్చుకోవాల్సి ఉంటుంది. ఆధార్ కార్డులోని ఫొటోను మార్చుకోవచ్చా అనే సందేహాం చాలామందిలో ఉంటుంది. అయితే ఫొటోను మార్చుకునే అవకాశం యూఐడీఏఐ కల్పిస్తోంది. ఈ కార్డులో ఫొటోను ఎన్నిసార్లు మార్చుకోవచ్చనే విషయంపై చాలామందికి అవగాహన ఉండదు. అయితే కేంద్ర ప్రభుత్వ నిబంధనల ప్రకారం మీరు ఫొటోను ఎన్నిసార్లు అయినా మార్చుకోవచ్చు. మీకు నచ్చినన్నీ సార్లు మార్చుకునే అవకాశం నిబంధనల ప్రకారం ఉంది. అయితే ఆన్లైన్ ద్వారా ఫొటో మార్చుకునే అవకాశం లేదు. ఇందుకోసం మీరు తప్పనిసరిగ్గా ఆధార్ సేవా కేంద్రాన్ని సందర్శించాల్సి ఉంటుంది. ఇందుకోసం కొంతమొత్తం రుసుం కూడా చెల్లించాలి. ప్రస్తుతం ఉచితంగా ఫొటోను అప్డేట్ చేసుకునే సౌకర్యం అందుబాటులో లేదు.
ఫీజు ఎంతంటే..?
మీ సమీపంలోని ఆధార్ సేవా కేంద్రానికి వెళ్లాలి. ఆధార్ అప్డేట్ ఫారం నింపాలి. అనంతరం మీ బయోమెట్రిక్ వెరిఫికేషన్ నిర్వహిస్తారు. ఆ తర్వాత కెమెరాను ఉపయోగించి కొత్త ఫొటో తీస్తారు. ఆ ఫొటో ఆధార్ కార్డుపై కనిపిస్తుంది. ఇందుకోసం రూ.125 సర్వీస్ ఛార్జీలు చెల్లించాల్సి ఉంటుంది. ఈ ప్రక్రియ ముగిసిన తర్వాత కొన్ని రోజుల్లో మీ ఆధార్ కొత్త ఫొటోతో అప్డేట్ అవుతుంది. అనంతరం మీరు కార్డును డౌన్ లోడ్ చేసుకోవచ్చు. అలాగే మీ ఇంటికి పోస్టాఫీస్ ద్వారా కొత్త ఆధార్ కార్డు వస్తుంది. మీరు దీనిని ఎప్పటిలాగే ఉపయోగించుకోవచ్చు. ఫొటోను అప్డేట్ చేసుకోవడం అనేది చాలా ముఖ్యం. లేపపోతే కేవైసీ విషయంలో సమస్యలు ఎదురుకావొచ్చు. దీంతో వయస్సు పెరిగే కొద్ద ఫొటోను ఎప్పటికప్పుడు అప్డేట్ చేసుకుంటూ ఉండాలి.