ఇలా ఓవర్ ది కౌంటర్ ఐ డ్రాప్స్ వాడే అలవాటు అత్యంత ప్రమాదకరమని, వైద్యుల సలహా లేకుండా డాక్టర్ ప్రిస్క్రిప్షన్ లేని చుక్కల మందు వాడటం వల్ల శాశ్వతంగా దృష్టి కోల్పోయే ప్రమాదం ఉందని నేత్ర వైద్య నిపుణులు తీవ్రంగా హెచ్చరిస్తున్నారు. వర్షాకాలంలో సొంతంగా ఐ డ్రాప్స్ వాడటం వల్ల కలిగే దుష్ప్రభావాలు మరియు తీసుకోవాల్సిన జాగ్రత్తల గురించి ఇప్పుడు తెలుసుకుందాం.
1. ఇన్ఫెక్షన్ రకం తెలియకపోవడం
కంటి ఇన్ఫెక్షన్లు వైరస్, బ్యాక్టీరియా, ఫంగస్ లేదా అలర్జీ వల్ల రావచ్చు.
బ్యాక్టీరియల్ ఇన్ఫెక్షన్లకు ‘యాంటీబాక్టీరియల్’ డ్రాప్స్ వాడాలి.
వైరల్ ఇన్ఫెక్షన్లకు వేరే రకం డ్రాప్స్ అవసరం.
వైరల్ ఇన్ఫెక్షన్ ఉన్నప్పుడు పొరపాటున యాంటీబాక్టీరియల్ లేదా అలర్జీ డ్రాప్స్ వాడితే ఇన్ఫెక్షన్ తగ్గకపోగా మరింత తీవ్ర రూపం దాలుస్తుంది.
2. స్టెరాయిడ్ ఐ డ్రాప్స్ వాడటంతో పెను ప్రమాదం
మెడికల్ షాపుల్లో దొరికే కొన్ని సాధారణ ఐ డ్రాప్స్లో స్టెరాయిడ్స్ ఉంటాయి. ఇవి వాడిన వెంటనే కంటి ఎరుపుదనం లేదా దురద తాత్కాలికంగా తగ్గినట్లు అనిపించినప్పటికీ, కంటి లోపల తీవ్రమైన నష్టాన్ని కలిగిస్తాయి. స్టెరాయిడ్ డ్రాప్స్ను డాక్టర్ పర్యవేక్షణ లేకుండా వాడటం వల్ల:
కంటి ఒత్తిడి పెరిగి గ్లాకోమా వచ్చే ప్రమాదం ఉంది.
కంటిలో శుక్లాలు త్వరగా వచ్చే అవకాశం ఉంటుంది.
కంటి రెటీనా లేదా కార్నియాపై పుండ్లు ఏర్పడి చూపు శాశ్వతంగా మందగించవచ్చు.
3. కంటి స్వయం రక్షణ శక్తి పడిపోవడం
వైద్యుడి సలహా లేకుండా పదే పదే చుక్కల మందులు వాడటం వల్ల కంట్లోని సహజసిద్ధమైన కన్నీళ్ల వ్యవస్థ దెబ్బతింటుంది. దీనివల్ల డ్రై ఐస్ సమస్య పెరగడమే కాకుండా, కంటికి ఏ చిన్న క్రిమి సోకినా త్వరగా కోలుకోలేని స్థితికి చేరుకుంటుంది.
4. డ్రగ్ రెసిస్టెన్స్
అవసరం లేకుండానే లేదా సరైన మోతాదు లేకుండా యాంటీబయోటిక్ చుక్కల మందులు వాడటం వల్ల, ఆ క్రిములు సదరు మందులకు అలవాటుపడి పోతాయి. తర్వాతి కాలంలో తీవ్రమైన ఇన్ఫెక్షన్ వచ్చినప్పుడు ఎంత మంచి మందులు వాడినా పనిచేయవు.
వర్షాకాలంలో కంటి ఆరోగ్య రక్షణకు నిపుణుల సలహాలు:
డాక్టర్ ప్రిస్క్రిప్షన్ తప్పనిసరి: కంటి సమస్య ఏదైనా సరే నేత్ర వైద్యుడిని సంప్రదించి వారు సూచించిన చుక్కల మందులను మాత్రమే నిర్ణీత రోజులు ఉపయోగించాలి.
పాత మందులు వాడకండి: గతంలో వాడి ఇంట్లో మిగిలిపోయిన డ్రాప్స్ను లేదా వేరొకరు ఉపయోగిస్తున్న డ్రాప్స్ను అస్సలు వాడకూడదు.
షాపింగ్ పరిశుభ్రత: ఐ డ్రాప్స్ బాటిల్ నాజిల్ను చేతులతో ముట్టుకోకూడదు. ఓపెన్ చేసిన 30 రోజుల తర్వాత ఆ బాటిల్ను ఉపయోగించకూడదు.
చేతులు శుభ్రంగా ఉంచుకోండి: కళ్లను తరచుగా చేతులతో నలపకూడదు. బయటకు వెళ్లినప్పుడు రక్షణగా అద్దాలు ధరించడం శ్రేయస్కరం.
గమనిక:
ఇది కేవలం సమాచారం మాత్రమే. సంస్థ దీనికి బాధ్యత వహించదు. పైన పేర్కొన్న వివరాలు సాధారణ ఆరోగ్య నివేదికలు నేత్ర వైద్య నిపుణుల సూచనల ప్రాతిపదికన అవగాహన కోసం మాత్రమే అందించబడ్డాయి. వర్షాకాలంలో కళ్లలో ఎరుపుదనం, నీరు కారడం, నొప్పి లేదా మసకబారడం వంటి సమస్యలు కనిపిస్తే వెంటనే అర్హులైన కంటి వైద్యుడిని సంప్రదించి తగిన చికిత్స పొందడం శ్రేయస్కరం.