నలంద, జులై 29: పెళ్లి విషయంలో జరిగిన వివాదం ఓ యువతిని తీవ్ర ప్రమాదంలోకి నెట్టింది. తనను పెళ్లి చేసుకోవాలని కోరిన ప్రియురాలితో గొడవపడిన ఓ యువకుడు, ఆమెను బైక్పై ఈడ్చుకెళ్లిన ఘటన బీహార్లోని నలంద జిల్లాలో చోటుచేసుకుంది. ఈ ఘటనకు సంబంధించిన వీడియో సోషల్ మీడియాలో వైరల్ కావడంతో పోలీసులు దర్యాప్తు ప్రారంభించారు. పోలీసులు తెలిపిన వివరాల ప్రకారం..
బీహార్లోని నవాడా జిల్లాకు చెందిన యువకుడు, రాజ్గిర్కు చెందిన యువతి కొంతకాలంగా ప్రేమించుకుంటున్నారు. వీరిద్దరూ తరచూ కలుసుకునేవారు. ఈ క్రమంలో ఇటీవల ఆ యువతి రాజ్గిర్కు వచ్చి ప్రియుడిని కలిసింది. ఈ సమయంలో మరోసారి పెళ్లి విషయాన్ని ప్రస్తావించడంతో ఇద్దరి మధ్య వాగ్వాదం జరిగింది. నవాడా జిల్లాలోని నర్దీగంజ్ బ్లాక్లో సర్వే అధికారిగా పనిచేస్తున్న యువకుడు పెళ్లికి నిరాకరించడంతో గొడవ తీవ్ర స్థాయికి చేరుకుంది. దీంతో అక్కడి నుంచి వెళ్లిపోవాలని యువకుడు నిర్ణయించుకున్నాడు. యువకుడు బైక్ స్టార్ట్ చేసి వెళ్లేందుకు ప్రయత్నించగా, యువతి అతడిని ఆపేందుకు బైక్ను పట్టుకుంది. అయితే బైక్ను ఆపకుండా ముందుకు నడిపించడంతో యువతి రోడ్డుపై పడిపోయి సుమారు 100 మీటర్ల దూరం వరకు ఈడ్చుకెళ్లబడింది. ఈ దృశ్యాలను అక్కడికి సమీపంలో ఉన్న కొందరు తమ మొబైల్ ఫోన్లలో రికార్డు చేశారు. బైక్ ఆపాలని అరుస్తూ కొందరు యువకుడి వెంట పరుగెత్తారు. కొంత దూరం వెళ్లిన తర్వాత బైక్ అదుపు తప్పి రోడ్డుపై బోల్తా పడింది. దీంతో ఇద్దరూ కిందపడిపోయారు.
पत्नी बाइक के हैंडल पर लटकी रही लेकिन पति ने बाइक को नहीं रोका..! @PoliceNalanda pic.twitter.com/aeYoaTfHgu
— Sadan Singh Rajput (@SadanJee) July 27, 2026
ప్రియుడిని చితకబాదిన స్థానికులు
ఘటన జరిగిన వెంటనే స్థానికులు అక్కడికి చేరుకుని యువతిని రక్షించి, యువకుడిని చితకబాదారు. ఈ సమయంలో యువకుడు ఆమె తన భార్య అని, ఇది కుటుంబ సమస్య అని చెప్పాడు. అయితే ఈ ఘటనపై యువతి పోలీసులకు ఫిర్యాదు చేసింది. రాజ్గిర్ పోలీస్ స్టేషన్ హౌస్ ఆఫీసర్ అభిజీత్ కుమార్ మాట్లాడుతూ.. ఈ ఘటన నాలుగైదు రోజుల క్రితం జరిగిందని తెలిపారు. ప్రేమ సంబంధంలో తలెత్తిన వివాహ వివాదమే దీనికి కారణమని వెల్లడించారు. యువతి నవాడాలోని నర్దీగంజ్ పోలీస్ స్టేషన్లో ఫిర్యాదు చేసిందని, ఫిర్యాదు ఆధారంగా నిందితుడిపై చట్టపరమైన చర్యలు తీసుకుంటున్నామని పోలీసులు తెలిపారు. ఈ ఘటన మరోసారి సంబంధాల్లో తలెత్తే వివాదాలను హింసాత్మకంగా పరిష్కరించకూడదని, చట్టపరమైన మార్గాలను ఆశ్రయించాలని సూచిస్తోంది.