సినిమా పరిశ్రమలో ఒక చిత్రం నిర్మించాలంటే కోట్ల రూపాయల బడ్జెట్, భారీ తారాగణం, ఆధునిక సాంకేతిక పరిజ్ఞానం అవసరమని అందరూ భావిస్తారు. విజువల్ ఎఫెక్ట్స్ (VFX), అద్భుతమైన యానిమేషన్ చిత్రాల నిర్మాణానికి వందల కోట్లు ఖర్చు చేయడం ఈరోజుల్లో పరిపాటిగా మారింది. అయితే, తాజాగా సినీ ప్రపంచాన్ని షాక్ కు గురిచేస్తూ ఒక చిన్న ప్రయత్నం బాక్సాఫీస్ వద్ద అపూర్వ విజయాన్ని అందుకుంది. కేవలం రూ. 19,000 బడ్జెట్తో తయారైన ఒక చైనీస్ యానిమేషన్ చిత్రం ఏకంగా రూ. 28 కోట్లకు పైగా కలెక్షన్లు సాధించి అందరినీ ఆశ్చర్యపరిచింది.
ఈ విచిత్రమైన, అద్భుతమైన విజయాన్ని సాధించిన చిత్రం పేరు 'న్యూ లై' (Niu Lai). ఈ చిత్రం తక్కువ ఖర్చుతో రూపొందడమే కాకుండా, కనీసం సరైన ప్రమోషనల్ పోస్టర్ లేదా మార్కెటింగ్ పబ్లిసిటీ కూడా లేకుండా విడుదలైంది. నేటి డిజిటల్ యుగంలో కోట్ల రూపాయలు పోస్టర్లు, టీజర్లు, ప్రమోషన్లకే ఖర్చు చేస్తున్న వేళ, ఈ సినిమా ఎలాంటి ఆర్భాటాలు లేకుండా ప్రేక్షకు ముందుకు వచ్చింది.
చిత్ర విమర్శకులు, కొందరు సినీ ప్రియులు ప్రారంభంలో ఈ సినిమా మేకింగ్ , యానిమేషన్ క్వాలిటీపై ప్రతికూల వ్యాఖ్యలు చేశారు. ఇది “నాసిరకం లేదా నాసిరకమైన సినిమా” అని కొట్టిపారేశారు. కానీ, సోషల్ మీడియా వేదికగా ఈ చిత్రం గురించి వ్యాపించిన మౌత్ టాక్ దీని రూపురేఖలనే మార్చేసింది. చిత్రంలో ఉన్న వినూత్నమైన కథనం, సరళమైన మానవీయ భావోద్వేగాలు, ప్రత్యేకమైన శైలి ప్రేక్షకులను విశేషంగా ఆకట్టుకున్నాయి.
నెటిజన్లు ఈ సినిమాను ఒక విశిష్టమైన కళాఖండంగా కొనియాడటం ప్రారంభించారు. దీంతో సోషల్ మీడియా ద్వారా లభించిన ప్రచారం బాక్సాఫీస్ వద్ద కలెక్షన్ల వర్షం కురిపించింది. కేవలం రూ. 19,000ల పెట్టుబడికి ఏకంగా రూ. 28 కోట్ల మేర రాబడి రావడం అంటే సామాన్యమైన విషయం కాదు. చిత్ర నిర్మాణ వ్యయంతో పోలిస్తే ఇది వేల రెట్ల లాభాన్ని తెచ్చిపెట్టిన అరుదైన రికార్డుగా నిలిచింది.
ఈ సినిమా విజయం సినిమా రంగానికి ఒక కొత్త పాఠాన్ని నేర్పింది. భారీ బడ్జెట్లు, అగ్ర నటీనటులు లేదా కోట్ల రూపాయల ప్రచార చిత్రాలు మాత్రమే ఒక సినిమా విజయాన్ని నిర్ణయించలేవు అని 'న్యూ లై' నిరూపించింది. కంటెంట్లో నిజాయితీ, కథలో బలం ఉంటే ప్రేక్షకులు ఏ చిత్రానికైనా బ్రహ్మరథం పడతారని ఈ చైనీస్ అద్భుతం మరోసారి రుజువు చేసింది. ప్రస్తుతం అంతర్జాతీయ సినీ వర్గాల్లో , సోషల్ మీడియాలో ఈ చిత్రం ఒక హాట్ టాపిక్గా మారింది.