ఇరవైల్లో ఉండేవారికి పనిచేసిన స్కిన్ కేర్ రొటీన్ను వయసు పెరిగినా అలాగే కొనసాగించడం సరైనది కాదని డెర్మటాలజిస్ట్ సూచిస్తున్నారు. 30, 40ల్లో చర్మానికి హైడ్రేషన్, స్కిన్ బ్యారియర్ రక్షణ, యాంటీఆక్సిడెంట్లు, కొల్లాజెన్కు మద్దతిచ్చే పదార్థాలపై ఎక్కువ దృష్టి పెట్టాలి.
1. 30ల్లో చర్మంలో ఏం మారుతుంది?
30ల్లోకి వచ్చిన తర్వాత కొల్లాజెన్, ఎలాస్టిన్ ఉత్పత్తి క్రమంగా తగ్గుతుంది. చర్మ కణాల పునరుత్పత్తి వేగం కూడా తగ్గడంతో ముఖం కాస్త డల్గా కనిపించవచ్చు. చర్మం తన తేమను ఎక్కువసేపు నిలుపుకోలేకపోవడంతో పొడిబారడం, ఫైన్ లైన్స్ కనిపించడం మొదలయ్యే అవకాశం ఉంటుంది.
2. 40ల్లో హార్మోన్ల ప్రభావం కూడా ఉంటుంది
40ల్లోకి చేరే సమయంలో హార్మోన్లలో వచ్చే మార్పులు చర్మంపై ప్రభావం చూపుతాయి. కొందరిలో చర్మం మరింత పొడిగా, సెన్సిటివ్గా లేదా మొటిమలకు గురయ్యేలా మారవచ్చు. పిగ్మెంటేషన్ కూడా పెరగొచ్చు. అందుకే ఈ వయసులో చర్మానికి సరైన మాయిశ్చరైజింగ్, బ్యారియర్ కేర్ అవసరం.
3. రెటినాయిడ్స్ ఉపయోగపడొచ్చు
30, 40ల్లో స్కిన్ కేర్లో రెటినాయిడ్స్ లేదా రెటినాల్కు ప్రాధాన్యం ఇవ్వవచ్చని డెర్మటాలజిస్ట్ సూచిస్తున్నారు. ఇవి కొల్లాజెన్ ఉత్పత్తికి, చర్మ కణాల పునరుత్పత్తికి సహాయపడతాయి. అయితే సున్నితమైన చర్మం ఉన్నవారు వీటిని స్వయంగా ఎక్కువగా ఉపయోగించకుండా నిపుణుల సలహా తీసుకోవడం మంచిది.
4. విటమిన్ C, హైలురోనిక్ యాసిడ్ కూడా ముఖ్యమే
విటమిన్ C యాంటీఆక్సిడెంట్గా పనిచేయడంతో పాటు కొల్లాజెన్ ఉత్పత్తికి మద్దతు ఇస్తుంది. హైలురోనిక్ యాసిడ్ చర్మానికి తేమ అందించడంలో సహాయపడుతుంది. సిరమైడ్స్ చర్మ బ్యారియర్ను కాపాడటానికి ఉపయోగపడతాయి. పెప్టైడ్స్ చర్మం దృఢత్వాన్ని నిలబెట్టుకోవడంలో సహాయపడవచ్చు.
5. స్క్రబ్ ఎక్కువగా చేయడం మంచిది కాదు
వయసు పెరిగేకొద్దీ చర్మం సున్నితంగా మారే అవకాశం ఉంటుంది. అందుకే తరచుగా యాసిడ్స్ ఉపయోగించడం, ఎక్కువగా ఎక్స్ఫోలియేట్ చేయడం వల్ల చర్మ బ్యారియర్ దెబ్బతినొచ్చు. ఎక్కువ ప్రొడక్ట్స్ వాడితేనే మంచి ఫలితం వస్తుందని భావించడం కూడా తప్పని నిపుణులు చెబుతున్నారు.
6. సన్స్క్రీన్ మాత్రం ఏ వయసులోనైనా తప్పనిసరి
రోజూ సన్స్క్రీన్ ఉపయోగించడం చాలా ముఖ్యమని డెర్మటాలజిస్ట్ స్పష్టం చేస్తున్నారు. సూర్యరశ్మి కొల్లాజెన్ నష్టాన్ని వేగవంతం చేయవచ్చు. అందుకే 30, 40ల్లో కూడా బ్రాడ్ స్పెక్ట్రమ్ SPF 30 లేదా అంతకంటే ఎక్కువ ఉన్న సన్స్క్రీన్ను రోజువారీ రొటీన్లో భాగం చేసుకోవాలి.
7. 30, 40ల్లో ఉదయం స్కిన్ కేర్ ఇలా
ఉదయం ముందుగా క్లెన్సర్తో ముఖాన్ని శుభ్రం చేసుకోవాలి. తర్వాత విటమిన్ C వంటి యాంటీఆక్సిడెంట్ సీరమ్, సిరమైడ్స్, హైలురోనిక్ యాసిడ్ ఉన్న మాయిశ్చరైజర్ ఉపయోగించవచ్చు. చివరగా SPF 30 లేదా అంతకంటే ఎక్కువ ఉన్న సన్స్క్రీన్ అప్లై చేయాలి.
8. రాత్రి రొటీన్లో ఏం ఉండాలి?
రాత్రి క్లెన్సింగ్ తర్వాత రెటినాల్ లేదా రెటినాయిడ్ ఆధారిత ఉత్పత్తిని ఉపయోగించి అనంతరం మాయిశ్చరైజర్ అప్లై చేయవచ్చు. AHAలు లేదా BHAలను వారానికి ఒకటి లేదా రెండుసార్లు మాత్రమే.. చర్మం తట్టుకునే సామర్థ్యాన్ని బట్టి ఉపయోగించవచ్చని నిపుణులు సూచిస్తున్నారు.
9. సోషల్ మీడియా ట్రెండ్స్ చూసి ప్రొడక్ట్స్ మార్చకండి
ఒక కొత్త స్కిన్ కేర్ ట్రెండ్ కనిపించగానే వెంటనే కొత్త కొత్త ప్రొడక్ట్స్ ఉపయోగించడం వల్ల చర్మానికి మేలు కంటే నష్టం జరిగే అవకాశం ఉంది. ముఖ్యంగా ఎక్కువ యాక్టివ్ ఇంగ్రిడియెంట్స్ను ఒకేసారి ఉపయోగించడం వల్ల ఇరిటేషన్ పెరగొచ్చు. వయసుకు, చర్మ రకానికి తగ్గ రొటీన్ ఉండటం ముఖ్యం.
గమనిక:
స్కిన్ కేర్ అవసరాలు ఒక్కొక్కరికి భిన్నంగా ఉంటాయి. ముఖ్యంగా రెటినాల్, రెటినాయిడ్స్, యాసిడ్స్ వంటి యాక్టివ్ ఇంగ్రిడియెంట్స్ను ఉపయోగించే ముందు డెర్మటాలజిస్ట్ సలహా తీసుకోవడం మంచిది.